యంగ్ సెన్సేషన్ అనిరుధ్ నుంచి కొత్త ప్రయోగం.. ‘అరవింద్’తో ఇండిపెండెంట్ మ్యూజిక్కు శ్రీకారం
- ‘అరవింద్’ పాట విడుదల చేసిన అనిరుధ్
- అల్బుకర్కీ రికార్డ్స్కు శ్రీకారం
- యూనివర్సల్ మ్యూజిక్తో తొలి ప్రాజెక్ట్
- స్వతంత్ర కళాకారుడి పోరాట కథ
- తన జీవితానికి దగ్గరగా ఉందన్న అనిరుధ్
2012లో విడుదలైన ‘వై దిస్ కొలవెరి డీ’తో దేశవ్యాప్తంగా గుర్తింపు తెచ్చుకున్న అనిరుధ్.. ఆ తర్వాత దక్షిణాదిలో వరుస బ్లాక్బస్టర్ చిత్రాలకు సంగీతం అందించారు. ‘విక్రమ్’, ‘లియో’, ‘జైలర్’, ‘దేవర’ వంటి చిత్రాలతో తన స్థాయిని పెంచుకున్నారు. ‘జవాన్’ సినిమాతో బాలీవుడ్లోనూ విజయాన్ని అందుకున్నారు. ఇప్పుడు ఇండిపెండెంట్ మ్యూజిక్ రంగంలోకి అడుగుపెట్టి మరో కొత్త ప్రయాణాన్ని మొదలుపెట్టారు.
‘అరవింద్’ పాటలో ఒక యువ సంగీతకారుడి పోరాటాన్ని చూపించారు. సంగీతంపై అపారమైన ప్రేమ ఉన్నా అవకాశాలు దొరక్క ఇబ్బందులు ఎదుర్కొనే కళాకారుడి కథ ఇది. డిజిటల్ యుగంలో పాటలను విడుదల చేయడం సులభమైనా, స్వతంత్ర కళాకారుడిగా గుర్తింపు సంపాదించడం ఎంత కష్టమో ఈ పాట ద్వారా చూపించే ప్రయత్నం చేశారు. ఒకరోజు తన ప్రతిభ ప్రపంచానికి తెలుస్తుందనే నమ్మకంతో ముందుకు సాగే యువకుడి భావోద్వేగ ప్రయాణమే ‘అరవింద్’.
ఈ పాట గురించి అనిరుధ్ మాట్లాడుతూ.. ‘‘అరవింద్ ప్రతి ఒక్కరిలో ఉండే వ్యక్తిత్వం. మన ప్రతిభను నిరూపించుకునేందుకు అవకాశం కోసం ఎదురుచూసే కళాకారుడి కథ ఇది. నేటి పోటీ ప్రపంచంలో ఒక ఇండిపెండెంట్ ఆర్టిస్ట్ ఎదుర్కొనే సవాళ్లను ఇందులో చూపించాం’’ అని తెలిపారు. ఈ పాట తనకు వ్యక్తిగతంగా కూడా చాలా దగ్గరగా ఉంటుందని చెప్పారు. కెరీర్ ప్రారంభంలో తాను కూడా ఇలాంటి పరిస్థితులనే ఎదుర్కొన్నానని గుర్తు చేశారు. యువ కళాకారులకు ఈ పాట ప్రేరణగా నిలుస్తుందని ఆశాభావం వ్యక్తం చేశారు. అల్బుకర్కీ రికార్డ్స్ ద్వారా భవిష్యత్తులో మరిన్ని స్వతంత్ర సంగీత ప్రాజెక్టులు, కొత్త తరహా కాన్సెప్ట్ ఆల్బమ్లు తీసుకురావాలని అనిరుధ్ భావిస్తున్నారు.
