ఏపీ అభివృద్ధిలో సింగపూర్ భాగస్వామ్యం.. ప్రధాని వాంగ్‌తో సీఎం చంద్రబాబు కీలక చర్చలు

ఆంధ్రప్రదేశ్ ముఖ్యమంత్రి చంద్రబాబు సింగపూర్ పర్యటనలో భాగంగా ఆ దేశ ప్రధాని లారెన్స్ వాంగ్‌తో సోమవారం సమావేశమయ్యారు. ఈ భేటీలో ఆంధ్రప్రదేశ్, సింగపూర్ మధ్య కొత్త భాగస్వామ్య అవకాశాలపై ఫలవంతమైన చర్చలు జరిపినట్లు సీఎం చంద్రబాబు స్వయంగా సోషల్ మీడియా వేదికగా వెల్లడించారు. రాష్ట్ర అభివృద్ధికి కీలకమైన పలు రంగాల్లో సహకారం కోసం ఈ సమావేశం దోహదపడిందని ఆయన పేర్కొన్నారు.

ఈ సందర్భంగా, సెమీకండక్టర్లు, ఆర్టిఫిషియల్ ఇంటెలిజెన్స్ (ఏఐ), క్వాంటం టెక్నాలజీస్, పరిశోధన-అభివృద్ధి వంటి అత్యాధునిక సాంకేతిక రంగాల్లో పరస్పర సహకారంపై ప్రధానంగా దృష్టి సారించినట్లు చంద్రబాబు తెలిపారు. వీటితో పాటు విశ్వవిద్యాలయాల మధ్య భాగస్వామ్యాలు, పట్టణ పాలన, నాయకత్వ అభివృద్ధి, లాజిస్టిక్స్, అధునాతన తయారీ వంటి అంశాలపై కూడా ఇరువురు నేతలు చర్చించుకున్నారు.

ముఖ్యంగా, ప్రపంచస్థాయి మౌలిక వసతులు, సంస్థలతో అమరావతిని ఒక గ్లోబల్ బెంచ్‌మార్క్ రాజధాని నగరంగా తీర్చిదిద్దడంలో ఆంధ్రప్రదేశ్ సాధించిన పురోగతిని ప్రధాని వాంగ్‌కు చంద్రబాబు వివరించారు. అమరావతి విజన్, పురోగతిని ప్రధాని లారెన్స్ వాంగ్ ప్రశంసించారని, దాని భవిష్యత్ సామర్థ్యంపై పూర్తి విశ్వాసం వ్యక్తం చేశారని ముఖ్యమంత్రి తెలిపారు.

ఈ చర్చల్లో సాంకేతిక రంగాలతో పాటు ప్రకృతి వ్యవసాయం, ఆక్వాకల్చర్, ఆహార ఎగుమతులు, వైద్యారోగ్యం, స్వచ్ఛ ఇంధనం, గ్రీన్ హైడ్రోజన్, గ్రీన్ అమోనియా వంటి రంగాల్లోనూ సహకారాన్ని అన్వేషించినట్లు చంద్రబాబు వివరించారు. అమరావతి అభివృద్ధిలో పాలుపంచుకోవాలని, ఆవిష్కరణలు, సుస్థిరత, ఆర్థిక అవకాశాలతో కూడిన భవిష్యత్‌కు తోడ్పడాలని సింగపూర్‌కు చెందిన ప్రభుత్వరంగ సంస్థలను, పారిశ్రామికవేత్తలను ఆయన ఈ సందర్భంగా సాదరంగా ఆహ్వానించారు. ఈ భేటీ ఏపీ-సింగపూర్ సంబంధాలను మరింత బలోపేతం చేస్తుందని రాజకీయ విశ్లేషకులు భావిస్తున్నారు.