సల్మాన్ ఖాన్ కేసుపై సినిమా.. బాలీవుడ్‌లో మొదలైన కొత్త వివాదం

బాలీవుడ్ స్టార్ సల్మాన్ ఖాన్‌కు సంబంధించిన కృష్ణ జింకల వేట కేసు మరోసారి వార్తల్లోకి వచ్చింది. ఈ కేసు ఆధారంగా తెరకెక్కుతున్న 'కాలా హిరన్' సినిమా చుట్టూ కొత్త వివాదం రాజుకుంది. ఈ సినిమా విడుదలను తక్షణమే నిలిపివేయాలంటూ సల్మాన్ ఖాన్ లీగల్ టీం.. చిత్ర నిర్మాతలకు లీగల్ నోటీసులు పంపింది. ఈ పరిణామం బాలీవుడ్‌లో చర్చనీయాంశంగా మారింది.

సినిమాకు సంబంధించిన పోస్టర్లు, ఇతర ప్రచార కంటెంట్‌ను వెంటనే తొలగించాలని సల్మాన్ తరఫు న్యాయవాదులు తమ నోటీసులో స్పష్టంగా పేర్కొన్నారు. తమ డిమాండ్లను నెరవేర్చకపోతే తదుపరి చట్టపరమైన చర్యలు తీసుకుంటామని తీవ్రంగా హెచ్చరించారు. దీంతో 'కాలా హిరన్' విడుదలపై అనిశ్చితి నెలకొంది. మే 29న ఈ సినిమాను ప్రకటించిన కొన్ని రోజులకే ఈ వివాదం మొదలవ్వడం గమనార్హం.

భారత్ ఎస్. శ్రీనెత్ దర్శకత్వం వహిస్తున్న 'కాలా హిరన్: ది బాటిల్ ఫర్ లెగసీ' చిత్రానికి అమిత్ జానీ నిర్మాతగా వ్యవహరిస్తున్నారు. గతంలో కన్హయ్య లాల్ హత్య కేసు వంటి పలు వివాదాస్పద అంశాలపై సినిమాలు నిర్మించి అమిత్ జానీ వార్తల్లో నిలిచారు. ఇటీవలే ఈ చిత్రానికి సంబంధించిన ఫస్ట్ లుక్ పోస్టర్‌ను కూడా విడుదల చేశారు. నిజ జీవితంలోని న్యాయ పోరాటాలు, యాక్షన్ ఘటనల స్ఫూర్తితో ఈ సినిమాను హాలీవుడ్ తరహాలో నిర్మిస్తున్నట్లు మేకర్స్ తెలిపారు. ఈ చిత్రం టీజర్‌ను ఈ నెల‌ 20న విడుదల చేయడానికి సన్నాహాలు చేస్తుండగా, ఇప్పుడు లీగల్ నోటీసులు అందాయి.

ఈ సినిమా కేవలం కృష్ణ జింకల వేట కేసుకే పరిమితం కాదని, సల్మాన్ ఖాన్, గ్యాంగ్‌స్టర్ లారెన్స్ బిష్ణోయ్ మధ్య ఉన్న వైరాన్ని కూడా సినిమా రూపంలో చూపించనున్నట్లు తెలుస్తోంది. ఉత్తరప్రదేశ్‌లోని సంభల్, మొరాదాబాద్ వంటి నగరాల్లో ఈ సినిమా షూటింగ్ జరుపుకుంది. కోర్టు డ్రామా, క్రైమ్ థ్రిల్లర్ జానర్‌లో ఈ సినిమా ఉండబోతోందని చిత్ర యూనిట్ ప్రకటించింది. తాజా లీగల్ నోటీసులతో ఈ సినిమా భవిష్యత్తు ఏమిటనేది ఆసక్తికరంగా మారింది.