ఇండియన్ ప్రీమియర్ లీగ్ (ఐపీఎల్) 2026 సీజన్ ముగియడంతో, టోర్నమెంట్‌లో అత్యుత్తమ ప్రదర్శన కనబరిచిన ఆటగాళ్లతో కూడిన 'బెస్ట్ ప్లేయింగ్ ఎలెవన్' పై విశ్లేషణలు వెలువడుతున్నాయి. మే 31న గుజరాత్ టైటాన్స్‌ను ఓడించి టైటిల్ గెలుచుకున్న రాయల్ ఛాలెంజర్స్ బెంగళూరు (ఆర్‌సీబీ) ఈ జాబితాలో పూర్తి ఆధిపత్యం ప్రదర్శించింది. ఆర్‌సీబీ నుంచి ఏకంగా ఐదుగురు ఆటగాళ్లకు ఈ జట్టులో చోటు దక్కడం విశేషం.

క్రీడా పండితుల విశ్లేషణల్లో 15 ఏళ్ల సంచలనం, రాజస్థాన్ రాయల్స్ ఓపెనర్ వైభవ్ సూర్యవంశీకి అగ్రస్థానం లభించింది. టోర్నీలో అద్భుత ప్రదర్శనతో ఆరెంజ్ క్యాప్ గెలుచుకున్న వైభవ్‌ను చాలామంది ఓపెనర్‌గా ఎంపిక చేశారు. వరుసగా రెండోసారి ఆర్‌సీబీకి టైటిల్ అందించిన రజత్ పటీదార్‌ను ఈ జట్టుకు కెప్టెన్‌గా పేర్కొన్నారు. గుజరాత్ టైటాన్స్ సారథి శుభ్ మన్ గిల్ కు ఈ జాబితాలో చోటు దక్కలేదు.

బెస్ట్ ప్లేయింగ్ ఎలెవన్ జాబితా:

వైభవ్ సూర్యవంశీ (రాజస్థాన్ రాయల్స్)
సాయి సుదర్శన్ (గుజరాత్ టైటాన్స్)
విరాట్ కోహ్లీ (రాయల్ ఛాలెంజర్స్ బెంగళూరు)
హెన్రిచ్ క్లాసెన్ (సన్‌రైజర్స్ హైదరాబాద్)
రజత్ పటీదార్ (కెప్టెన్, రాయల్ ఛాలెంజర్స్ బెంగళూరు)
కృనాల్ పాండ్యా (రాయల్ ఛాలెంజర్స్ బెంగళూరు)
రషీద్ ఖాన్ (గుజరాత్ టైటాన్స్)
జోఫ్రా ఆర్చర్ (రాజస్థాన్ రాయల్స్)
భువనేశ్వర్ కుమార్ (రాయల్ ఛాలెంజర్స్ బెంగళూరు)
కగిసో రబాడ (గుజరాత్ టైటాన్స్)
రసిఖ్ సలామ్ దార్ (రాయల్ ఛాలెంజర్స్ బెంగళూరు)

ఈ టోర్నీలో వైభవ్ సూర్యవంశీ 16 మ్యాచ్‌ల్లో 776 పరుగులతో ఆరెంజ్ క్యాప్ గెలుచుకున్నాడు. గుజరాత్ టైటాన్స్ పేసర్ కగిసో రబాడ 29 వికెట్లతో పర్పుల్ క్యాప్ అందుకున్నాడు. ఇక ఫైనల్‌లో అజేయంగా 75 పరుగులు చేసిన విరాట్ కోహ్లీ, ఈ సీజన్‌లో మొత్తం 675 పరుగులతో సత్తా చాటాడు. ఇషాన్ కిషన్, ప్రిన్స్ యాదవ్, శుభ్‌మన్ గిల్‌లను ఇంపాక్ట్ ప్లేయర్లుగా ఎంపిక చేశారు.