నేను ఇప్పటివరకు చేయని పాత్ర ఇది: 'పెద్ది' గురించి రామ్ చరణ్

గ్లోబల్ స్టార్ రామ్ చరణ్ తన తాజా చిత్రం ‘పెద్ది’లోని పాత్రపై ఆసక్తికర వ్యాఖ్యలు చేశారు. బుచ్చిబాబు దర్శకత్వంలో రూపుదిద్దుకున్న ఈ స్పోర్ట్స్ డ్రామాలో తాను పోషించిన పాత్ర తన కెరీర్‌లోనే పూర్తి భిన్నమైనదని ఆయన తెలిపారు. ఈ సినిమాతో నటుడిగా ఎన్నో విషయాలు నేర్చుకున్నానని వెల్లడించారు. జూన్ 4న విడుదల కానున్న ‘పెద్ది’ ప్రమోషన్లలో భాగంగా బాలీవుడ్ మీడియాతో చరణ్ మాట్లాడారు.

‘‘పెద్ది సినిమాలో నేను చేసిన పాత్ర నా కెరీర్‌లో ఇప్పటివరకు చేయలేదు. ఇది పూర్తిగా భిన్నమైనది. ఈ సినిమాలో చాలా మంది గొప్ప నటులతో కలిసి పనిచేయడం వల్ల ఎన్నో విషయాలు నేర్చుకునే అవకాశం దొరికింది’’ అని రామ్ చరణ్ వివరించారు. ఈ చిత్రంలో రామ్ చరణ్ నటన అద్భుతంగా ఉంటుందని చిత్ర యూనిట్ వర్గాలు చెబుతున్నాయి.

ఇదే కార్యక్రమంలో పాల్గొన్న ప్రముఖ నటుడు బొమన్ ఇరానీ, రామ్ చరణ్ గురించి ప్రశంసలు కురిపించారు. ఈ సినిమాలో చరణ్ మూడు రకాల క్రీడలు (కుస్తీ, క్రికెట్, రన్నింగ్) ప్రదర్శించారని, నాలుగో ‘ఆట’గా డ్యాన్స్‌తో అదరగొట్టారని తెలిపారు. గుర్తింపు కోసం ఒక వ్యక్తి ఎంత దూరమైనా వెళ్లగలడని ఈ సినిమా నిరూపిస్తుందని బొమన్ ఇరానీ అన్నారు. ఈ చిత్రంలో జాన్వీ కపూర్ కీలక పాత్రలో నటిస్తుండగా, సినిమా విడుదల తేదీ దగ్గర పడుతుండటంతో ఈ వ్యాఖ్యలు అంచనాలను మరింత పెంచుతున్నాయి.