రూ.74వేల‌ కోట్లు పెరిగిన సంపద.. గ‌త వారం లాభపడిన టాప్ కంపెనీలివే!

గత వారంలో దేశీయ స్టాక్ మార్కెట్లు సానుకూలంగా స్పందించడంతో దేశంలోని టాప్-10 కంపెనీలలో ఆరింటి మార్కెట్ విలువ భారీగా పెరిగింది. ఈ ఆరు కంపెనీల సంయుక్త మార్కెట్ క్యాపిటలైజేషన్ (విలువ) ఏకంగా రూ.74,111.57 కోట్లు వృద్ధి చెందింది. ఈక్విటీ మార్కెట్లలో సానుకూల ధోరణి కనిపించడంతో ఐసీఐసీఐ బ్యాంక్, టీసీఎస్, ఎల్ఐసీ వంటి దిగ్గజాలు లాభాల్లో పయనించాయి. గత వారంలో బీఎస్ఈ బెంచ్‌మార్క్ సూచీ 177.36 పాయింట్లు (0.23 శాతం) లాభపడింది.

లాభపడిన కంపెనీలు ఇవే.. 
గడిచిన వారంలో లాభపడిన కంపెనీలలో టాటా కన్సల్టెన్సీ సర్వీసెస్ (టీసీఎస్) అగ్రస్థానంలో నిలిచింది. టీసీఎస్ మార్కెట్ విలువ అత్యధికంగా రూ.19,338.68 కోట్లు పెరిగి రూ.8,38,401.33 కోట్లకు చేరింది. ఆ తర్వాత ఐసీఐసీఐ బ్యాంక్ మార్కెట్ క్యాప్ రూ.14,515.93 కోట్లు ఎగబాకి రూ.9,06,901.32 కోట్లకు చేరుకుంది.

ఇక, లైఫ్ ఇన్సూరెన్స్ కార్పొరేషన్ ఆఫ్ ఇండియా (ఎల్ఐసీ) మార్కెట్ విలువ రూ.9,076.37 కోట్లు పెరిగి రూ.5,14,443.69 కోట్లకు చేరగా, బజాజ్ ఫైనాన్స్ విలువ రూ.3,797.83 కోట్లు పెరిగి రూ.5,70,515.57 కోట్లకు చేరుకుంది. లార్సెన్ అండ్ టూబ్రో సంపద కూడా రూ.2,685.87 కోట్లు పెరిగి మొత్తం రూ.5,40,228.21 కోట్లుగా నమోదైంది.

నష్టపోయిన సంస్థలు
హెచ్‌డీఎఫ్‌సీ బ్యాంక్, భారతీ ఎయిర్‌టెల్, స్టేట్ బ్యాంక్ ఆఫ్ ఇండియా (ఎస్బీఐ), హిందుస్థాన్ యూనిలీవర్ (హెచ్‌యూఎల్) తమ మార్కెట్ విలువను కోల్పోయాయి. అత్యధికంగా భారతీ ఎయిర్‌టెల్ మార్కెట్ క్యాప్ రూ.20,229.67 కోట్లు తగ్గి రూ.11,40,295.49 కోట్లకు పడిపోయింది. హిందుస్థాన్ యూనిలీవర్ విలువ రూ.16,212.18 కోట్లు, ఎస్బీఐ విలువ రూ.12,784.4 కోట్లు, హెచ్‌డీఎఫ్‌సీ బ్యాంక్ విలువ రూ.2,094.35 కోట్లు చొప్పున తగ్గాయి.

ఇక, దేశంలో అత్యంత విలువైన కంపెనీల ర్యాంకింగ్‌లో హెచ్‌డీఎఫ్‌సీ బ్యాంక్ తన అగ్రస్థానాన్ని నిలబెట్టుకుంది. ఆ తర్వాత భారతీ ఎయిర్‌టెల్, ఐసీఐసీఐ బ్యాంక్, ఎస్బీఐ, టీసీఎస్, బజాజ్ ఫైనాన్స్ ఉన్నాయి.