ఇరాన్‌ను దెబ్బతీశాం.. చర్చల కోసం వెంపర్లాడుతోంది: డొనాల్డ్ ట్రంప్

అమెరికా అధ్యక్షుడు డొనాల్డ్ ట్రంప్ ఇరాన్‌పై సంచలన వ్యాఖ్యలు చేశారు. అమెరికా చేపట్టిన సైనిక చర్యలతో ఇరాన్ తీవ్రంగా బలహీనపడిందని, ఇప్పుడు చర్చల కోసం వెంపర్లాడుతోందని ఆయన పేర్కొన్నారు. టెహ్రాన్‌ను ఎట్టి పరిస్థితుల్లోనూ అణ్వాయుధాన్ని కలిగి ఉండనివ్వబోమని ట్రంప్ స్పష్టం చేశారు. న్యూయార్క్‌లోని రాక్‌లాండ్ కౌంటీలో జరిగిన ఓ ర్యాలీలో మద్దతుదారులను ఉద్దేశించి ఆయన ప్రసంగించారు.

ఈ సందర్భంగా ట్రంప్ మాట్లాడుతూ.. "ఇప్పుడు ఇరాన్ నేవీ, వైమానిక దళం అన్నీ నాశనమయ్యాయి. వారి నాయకులు కూడా పోయారు. కానీ, ఫేక్ న్యూస్ చూస్తే అంతా సవ్యంగా ఉన్నట్లు చూపిస్తారు. వాస్తవానికి వారు అస్సలు బాగా లేరు. చర్చల కోసం తీవ్రంగా ప్రయత్నిస్తున్నారు" అని వ్యాఖ్యానించారు. ఇరాన్‌ను అణ్వాయుధం తయారు చేయకుండా తాము అడ్డుకున్నామని, తమ చర్యలు లేకపోతే ఆ దేశం ఇప్పటికే అణుబాంబు సంపాదించి ఉండేదని అన్నారు. "వారికి ఎప్పటికీ అణ్వాయుధం ఉండదు. మేం దానిని ఆపాం" అని ఆయన పునరుద్ఘాటించారు.

ఇరాన్‌తో వ్యవహారం పూర్తయిన వెంటనే ప్రపంచవ్యాప్తంగా చమురు ధరలు ఒక్కసారిగా పడిపోతాయని ట్రంప్ జోస్యం చెప్పారు. ఇరాన్‌ను "ప్రపంచంలోనే ఉగ్రవాదాన్ని ప్రోత్సహిస్తున్న నంబర్ 1 దేశం"గా అభివర్ణించిన ఆయన, 'ఆపరేషన్ ఎపిక్ ఫ్యూరీ'ని ప్రస్తావించారు. ప్రపంచవ్యాప్తంగా సమస్యలు సృష్టించేందుకు ఇరాన్ డబ్బు ఖర్చు చేస్తోందని, కానీ అది ఇకపై జరగదని హెచ్చరించారు. ప్రస్తుతం అమెరికా సైన్యం ప్రపంచంలోనే అత్యంత శక్తివంతమైనదని, తమ సైనిక సామగ్రికి సాటిలేదని కొనియాడారు.

తన హయాంలో అమెరికా ప్రపంచ వేదికపై గౌరవాన్ని తిరిగి నిలబెట్టుకుందని, బైడెన్ పాలనలో దేశం బలహీనపడిందని విమర్శించారు. ప్రపంచ ఉద్రిక్తతల మధ్య కూడా తన విధానాల వల్లే అమెరికా ఆర్థిక వ్యవస్థ బలపడిందని, డోజోన్స్ సూచీ 50,702 పాయింట్ల మార్కును తాకిందని గొప్పగా చెప్పారు. ర్యాలీలో వలసలు, నేరాలు, పన్ను కోతలపై ప్రధానంగా మాట్లాడినప్పటికీ, ట్రంప్ పదేపదే విదేశాంగ విధాన అంశాలను ప్రస్తావించారు.