టెక్నాలజీలో టాప్ ఎవరు? అమెరికాను దాటేసిన ఆసియా దేశం

సాంకేతిక రంగంలో ప్రపంచాన్ని శాసిస్తున్న దేశాల జాబితా విడుదలైంది. 2026 సంవత్సరానికి గానూ ప్రపంచంలో అత్యంత అధునాతన టెక్నాలజీ కలిగిన దేశాల ర్యాంకులను వరల్డ్ అట్లాస్ నివేదిక వెల్లడించింది. ఈ జాబితాలో ఆసియా దేశం దక్షిణ కొరియా అగ్రస్థానంలో నిలిచి, టెక్ దిగ్గజం అమెరికాను రెండో స్థానానికి నెట్టింది. డిజిటలైజేషన్, ఇంటర్నెట్ వేగం, పరిశోధన-అభివృద్ధి (ఆర్ అండ్ డీ)పై పెట్టే పెట్టుబడుల ఆధారంగా ఈ ర్యాంకులను ఖరారు చేశారు.

నివేదిక ప్రకారం, దక్షిణ కొరియా తన జీడీపీలో దాదాపు 5 శాతం నిధులను పరిశోధన-అభివృద్ధి కోసం కేటాయిస్తోంది. సెమీకండక్టర్లు, 5జీ టెక్నాలజీ, ఎలక్ట్రానిక్స్‌లో ఆ దేశం తిరుగులేని ఆధిపత్యం చెలాయిస్తోంది. మరోవైపు, అమెరికా పరిశోధన-అభివృద్ధిపై ఏటా సుమారు 823 బిలియన్ డాలర్లు ఖర్చు చేస్తున్నప్పటికీ రెండో స్థానంతో సరిపెట్టుకుంది. ఆర్టిఫిషియల్ ఇంటెలిజెన్స్ (ఏఐ), సాఫ్ట్‌వేర్‌ రంగాల్లో అమెరికా అగ్రగామిగా కొనసాగుతోంది. అధునాతన చిప్‌ల తయారీలో కీలక పాత్ర పోషిస్తున్న తైవాన్ మూడో స్థానంలో నిలిచింది.

ఈ జాబితాలో యూరప్ దేశాలు తమ ప్రత్యేకతను చాటుకున్నాయి. పునరుత్పాదక ఇంధనంలో డెన్మార్క్ (4వ ర్యాంక్), ఫార్మాస్యూటికల్స్‌లో స్విట్జర్లాండ్ (5వ ర్యాంక్) ముందున్నాయి. ఇక స్టార్టప్‌లకు, సైబర్ సెక్యూరిటీకి పెట్టింది పేరైన ఇజ్రాయెల్ ఆరో స్థానంలో నిలిచింది. ఆ దేశం తన జీడీపీలో 6 శాతానికి పైగా పరిశోధన-అభివృద్ధి కోసం ఖర్చు చేయడం విశేషం.

ఫిన్లాండ్ (7), నెదర్లాండ్స్ (8), స్వీడన్ (9), నార్వే (10) తర్వాతి స్థానాల్లో నిలిచాయి. టెలికాం, గేమింగ్, క్లీన్ ఎనర్జీ వంటి రంగాల్లో ఈ దేశాలు ముందున్నాయి. కేవలం ఆర్థిక పరిమాణం మాత్రమే కాకుండా, టెక్నాలజీని రోజువారీ జీవితంలో ఎంతగా భాగం చేశారనే అంశం ఈ ర్యాంకుల్లో కీలక పాత్ర పోషించింది.