ప్రభాకరన్ కు సీఎం విజయ్ నివాళి.. రాహుల్ గాంధీని టార్గెట్ చేసిన బీజేపీ

తమిళనాడు ముఖ్యమంత్రి విజయ్ సోషల్ మీడియాలో చేసిన ఒక పోస్ట్ దేశ రాజకీయాల్లో తీవ్ర దుమారం రేపింది. నిషేధిత సంస్థ లిబరేషన్ టైగర్స్ ఆఫ్ తమిళ్ ఈలం (ఎల్టీటీఈ) వ్యవస్థాపకుడు వేలుపిళ్లై ప్రభాకరన్‌ మరణించిన ప్రాంతమైన ‘ముల్లివైక్కల్’ను స్మరించుకుంటూ ఆయన నివాళులు అర్పించడం ఈ వివాదానికి కేంద్ర బిందువుగా మారింది. ఈ పరిణామంపై బీజేపీ తీవ్రంగా స్పందించగా, విజయ్ పార్టీ తమిళగ వెట్రి కళగం (టీవీకే) వివరణ ఇచ్చే ప్రయత్నం చేసింది.

వివాదం ఏంటి?
శ్రీలంక సైన్యం చేతిలో ప్రభాకరన్ 2009 మే 18న ముల్లివైక్కల్‌లో మరణించారు. ఆ ఘటనను గుర్తు చేసుకుంటూ సీఎం విజయ్ నిన్న ఎక్స్‌లో ఒక పోస్ట్ చేశారు. "ముల్లివైక్కల్ జ్ఞాపకాలను మన గుండెల్లో పదిలపరుచుకుందాం! సముద్రం ఆవల ఉన్న మన తమిళ సోదరుల హక్కుల కోసం ఎల్లప్పుడూ అండగా నిలుస్తాం!" అని అందులో పేర్కొన్నారు. ఈ పోస్ట్ క్షణాల్లో వైరల్ అయి, రాజకీయ ప్రకంపనలకు దారితీసింది.

బీజేపీ విమర్శలు.. కాంగ్రెస్‌కు చురకలు
ఈ అంశాన్ని బీజేపీ వెంటనే అందిపుచ్చుకుంది. ఆ పార్టీ మీడియా విభాగం చీఫ్ అమిత్ మాలవీయ, కాంగ్రెస్ నేత రాహుల్ గాంధీని లక్ష్యంగా చేసుకుని విమర్శలు గుప్పించారు. "తమిళనాడు కొత్త ముఖ్యమంత్రి, మాజీ ప్రధాని రాజీవ్ గాంధీని హత్య చేసిన ఎల్టీటీఈ చీఫ్ వేలుపిళ్లై ప్రభాకర్‌కు నివాళులు అర్పించారు. అధికారంలో వాటా వస్తున్నంత కాలం రాహుల్ గాంధీకి దీంతో ఎలాంటి సమస్యా ఉండదు. గతంలో డీఎంకే కూడా ఎల్టీటీఈ సానుభూతిపరురాలే, అయినా కాంగ్రెస్ వారితో సౌకర్యవంతంగానే పొత్తు పెట్టుకుంది" అంటూ తీవ్ర స్థాయిలో విమర్శించారు. రాజీవ్ గాంధీ హత్య కేసులో ప్రభాకరన్ ప్రధాన నిందితుడు కావడం, ఆ కారణంగానే భారత్‌లో ఎల్టీటీఈపై నిషేధం కొనసాగుతుండటాన్ని ఆయన గుర్తు చేశారు.

విజయ్ పార్టీ వివరణ
విమర్శలు వెల్లువెత్తడంతో విజయ్ పార్టీ టీవీకే స్పందించింది. పార్టీ వర్గాల కథనం ప్రకారం సీఎం విజయ్ చేసిన పోస్ట్ కేవలం ప్రభాకరన్ మరణానికి సంబంధించింది కాదని, ముల్లివైక్కల్‌లో శ్రీలంక సైన్యం జరిపిన మారణహోమంలో ప్రాణాలు కోల్పోయిన వేలాది మంది అమాయక తమిళులను స్మరించుకోవడమే దాని ఉద్దేశమని తెలిపింది. అమాయకుల ప్రాణనష్టాన్ని గుర్తు చేసుకోవడం బాధ్యత గల నాయకుడి కర్తవ్యమని, సీఎం తన పోస్టులో ఎక్కడా ప్రభాకరన్ పేరును ప్రస్తావించలేదని వారు స్పష్టం చేశారు. ప్రపంచవ్యాప్తంగా ఉన్న తమిళులు మే 18ని ‘ముల్లివైక్కల్ స్మారక దినం’గా పాటిస్తారని వారు గుర్తు చేశారు.

రాజకీయ సమీకరణాలు
దాదాపు 30 ఏళ్ల పాటు సాగిన శ్రీలంక అంతర్యుద్ధం, 2009లో ముల్లివైక్కల్ వద్ద జరిగిన భీకర పోరుతో ముగిసింది. అప్పట్నుంచి తమిళనాడులో అధికారంలో ఉన్న పార్టీలు ప్రభాకరన్‌కు మద్దతుకు ప్రకటించకుండా దూరంగా ఉంటూ వచ్చాయి. అయితే, మైనారిటీ ప్రభుత్వంలో ఉన్న విజయ్ ఎల్టీటీఈ అనుకూల వైఖరి ఉన్న వీసీకే పార్టీ మద్దతుతో అధికారంలో కొనసాగుతున్నారు. ఇప్పుడు రాజీవ్ గాంధీ కుటుంబానికి చెందిన కాంగ్రెస్ పార్టీ కూడా విజయ్ ప్రభుత్వానికి మద్దతిస్తుండటంతో, ఈ తాజా వివాదం కాంగ్రెస్‌ను ఇరకాటంలో పడేసింది. గతంలో ఎన్నికల ప్రచారంలోనూ విజయ్, ఈలం తమిళులకు నాయకత్వం కొరవడిందని, వారికి అండగా నిలవాల్సిన బాధ్యత మనపై ఉందని వ్యాఖ్యానించడం గమనార్హం.