అచ్చం ట్రంప్ లాగే ఉంది... వైరల్ అవుతున్న బంగ్లాదేశ్ గేదె!

బంగ్లాదేశ్‌లో రెండు తెల్ల గేదెలు ఇప్పుడు స్థానికంగా పెద్ద ఆకర్షణగా మారాయి. ఢాకా సమీపంలోని నారాయణ్‌గంజ్‌లో ఉన్న ఒక ఫామ్‌లోని ఈ గేదెలకు వాటి యజమానులు పెట్టిన పేర్లే ఈ క్రేజ్‌కు కారణం. ఒక గేదెకు 'డొనాల్డ్ ట్రంప్' అని, మరొకదానికి 'బెంజమిన్ నెతన్యాహు' అని పేర్లు పెట్టడంతో, వాటిని చూసేందుకు జనం గుంపులుగా తరలివస్తున్నారు. వాటితో సెల్ఫీలు తీసుకుంటూ సోషల్ మీడియాలో పోస్టు చేయడంతో ఇవి వైరల్ అయ్యాయి.

ట్రంప్ ప్రశాంతం.. నెతన్యాహు దూకుడు..
'డొనాల్డ్ ట్రంప్' అని పిలుస్తున్న గేదె సుమారు 700 కిలోల బరువు ఉంది. దీని తెల్లటి చర్మం, జుట్టు చూడటానికి ట్రంప్ జుట్టును పోలి ఉందని స్థానికులు సరదాగా అంటున్నారు. "పేరు ట్రంప్‌దే అయినా, దీని స్వభావం చాలా ప్రశాంతం" అని ఓ సందర్శకుడు వ్యాఖ్యానించాడు. యజమాని జియాఉద్దీన్ మ్రిధా సోదరుడు ఈ పేరు పెట్టారు. రెచ్చగొడితే తప్ప ఇది ఎప్పుడూ ప్రశాంతంగానే ఉంటుందని చెబుతున్నారు.

ఇక 'నెతన్యాహు' గేదె బరువు 750 కిలోలకు పైనే ఉంటుంది. దీని ప్రవర్తన మాత్రం పేరుకు తగ్గట్టుగానే చాలా దూకుడుగా, అనూహ్యంగా ఉంటుంది. తరచూ గురకపెట్టడం, హ్యాండ్లర్లపైకి దూకడం వంటివి చేస్తుందని ఫామ్ మేనేజర్ తెలిపారు. దీనికి "చెడ్డ ప్రవర్తన, దుర్మార్గమైన తెలివి" ఉన్నట్లు అనిపిస్తుందని ఆయన సరదాగా వ్యాఖ్యానించారు. ఈద్ అల్-అధా పండుగ నేపథ్యంలో జంతువుల అమ్మకాలు జరిగే ఈ సమయంలో, ఈ రెండు గేదెలు తమ వింత పేర్లతో, విభిన్న స్వభావాలతో బంగ్లాదేశ్‌లో హాట్ టాపిక్‌గా మారాయి.