మీ వయస్సును వెనక్కి మళ్లించవచ్చు... అందుకు ఏం చేయాలంటే...!

వయసు పెరగడం సహజ ప్రక్రియ. కానీ, మన శరీరంలోని అవయవాల పనితీరును సూచించే జీవసంబంధ వయసును (బయోలాజికల్ ఏజ్) సరైన ఆహారపు అలవాట్లతో తగ్గించుకోవచ్చని ఓ కొత్త అధ్యయనం తేల్చింది. యూనివర్సిటీ ఆఫ్ సిడ్నీ పరిశోధకులు చేసిన ఈ అధ్యయనం ప్రకారం, కేవలం నాలుగు వారాల్లోనే సానుకూల ఫలితాలు కనిపించడం విశేషం.

"ఏజింగ్ సెల్" అనే జర్నల్‌లో ప్రచురితమైన ఈ అధ్యయనాన్ని డాక్టర్ కైట్లిన్ ఆండ్రూస్ నేతృత్వంలోని బృందం నిర్వహించింది. ఇందులో భాగంగా 65 నుంచి 75 ఏళ్ల మధ్య వయసున్న 104 మంది ఆరోగ్యవంతులపై పరిశోధన చేశారు. వారిని నాలుగు గ్రూపులుగా విభజించి, మాంసాహారం మరియు పాక్షిక శాఖాహారంతో కూడిన వేర్వేరు ఆహార ప్రణాళికలను అమలు చేశారు. వీటిలో కొవ్వు, పిండిపదార్థాల మోతాదును మార్చి పరీక్షించారు.

ఈ పరిశోధనలో, తక్కువ కొవ్వు (లో-ఫ్యాట్) మరియు ఎక్కువ పిండిపదార్థాలు (హై-కార్బ్) ఉన్న మాంసాహారం తీసుకున్న వారిలో జీవసంబంధ వయసు గణనీయంగా తగ్గినట్టు గుర్తించారు. వీరి ఆహారంలో సుమారుగా 14 శాతం ప్రోటీన్, 28-29 శాతం కొవ్వు, 53 శాతం పిండిపదార్థాలు ఉన్నాయి. ఈ మార్పుల వల్ల కొలెస్ట్రాల్, ఇన్సులిన్ స్థాయులు, రక్తపోటు వంటి 20 కీలక ఆరోగ్య సూచికలు కూడా మెరుగుపడ్డాయి.

క్యాలెండర్ ప్రకారం పెరిగే వయసును (క్రోనోలాజికల్ ఏజ్) ఆపలేం. కానీ, గుండె, జీర్ణవ్యవస్థ వంటి అంతర్గత అవయవాల ఆరోగ్యాన్ని బట్టి ఉండే జీవసంబంధ వయసును మెరుగుపరచుకోవచ్చని ఈ అధ్యయనం స్పష్టం చేస్తోంది. 

అయితే, ఇవి ప్రాథమిక ఫలితాలు మాత్రమేనని, దీనివల్ల ఆయుష్షు పెరుగుతుందా అనే దానిపై మరింత పరిశోధన అవసరమని శాస్త్రవేత్తలు తెలిపారు. ఏదేమైనా, సరైన ఆహారం ద్వారా స్వల్పకాలంలోనే ఆరోగ్యాన్ని గణనీయంగా మెరుగుపరచుకోవచ్చని ఈ అధ్యయనం నిరూపిస్తోంది.