ప్యారిస్‌లో వింత స్కామ్.. బెట్టింగ్‌ల కోసం టెంపరేచర్ ట్యాంపరింగ్!

ఫ్రాన్స్‌ రాజధాని ప్యారిస్‌లోని అత్యంత రద్దీ విమానాశ్రయం, చార్లెస్ డి గాల్‌లో ఓ వింత మోసం వెలుగులోకి వచ్చింది. ఆన్‌లైన్ బెట్టింగ్‌ల కోసం ఇక్కడి వాతావరణ సెన్సార్‌ను ట్యాంపర్ చేసినట్లు అధికారులు అనుమానిస్తున్నారు. ఈ ఘటనపై ఫ్రాన్స్ జాతీయ వాతావరణ సంస్థ 'మెటియో ఫ్రాన్స్' అధికారికంగా పోలీసులకు ఫిర్యాదు చేసింది. విమానాశ్రయంలోని ఆటోమేటెడ్ డేటా ప్రాసెసింగ్ సిస్టమ్‌ను ఉద్దేశపూర్వకంగా మార్పులు చేశారని, దీనిపై దర్యాప్తు జరపాలని కోరింది.

అస‌లేం జరిగింది?
అమెరికన్ బెట్టింగ్ ప్లాట్‌ఫామ్ అయిన 'పాలీమార్కెట్‌'లో నగరాల రోజువారీ గరిష్ఠ ఉష్ణోగ్రతలపై పందాలు కాస్తుంటారు. ఏప్రిల్ నెలలో రెండు వేర్వేరు సందర్భాల్లో ప్యారిస్ ఉష్ణోగ్రతలపై పందెం కాసిన కొందరు యూజర్లు భారీ మొత్తంలో డబ్బు గెలుచుకున్నారు.

ఏప్రిల్ 6న సాయంత్రం 7 గంటల సమయంలో చార్లెస్ డి గాల్ ఎయిర్‌పోర్ట్‌లోని సెన్సార్‌లో ఉష్ణోగ్రత అకస్మాత్తుగా 22 డిగ్రీల సెల్సియస్‌కు పెరిగింది. వాస్తవానికి ఆ రోజు సగటు ఉష్ణోగ్రత 18 డిగ్రీలుగా ఉంది. ఈ ఊహించని పెరుగుదలపై పందెం కాసిన ఒక యూజర్ 14,000 డాల‌ర్లు (దాదాపు రూ. 11.6 లక్షలు) గెలుచుకున్నాడు. సరిగ్గా తొమ్మిది రోజుల తర్వాత ఏప్రిల్ 15న మళ్లీ అదే తరహాలో ఉష్ణోగ్రత 22 డిగ్రీలకు చేరింది. ఈసారి మరో యూజర్ ఏకంగా 20,000 డాల‌ర్లు (సుమారు రూ. 16.6 లక్షలు) గెలుపొందాడు.

హెయిర్ డ్రైయర్‌తో ట్యాంపరింగ్?
ఈ అసాధారణ మార్పులను ఫ్రాన్స్‌కు చెందిన 'ఇన్ఫోక్లైమేట్' అనే పర్యావరణ స్వచ్ఛంద సంస్థ గుర్తించి, వాతావరణ అధికారులను అప్రమత్తం చేసింది. బ్యాటరీతో పనిచేసే హెయిర్ డ్రైయర్‌ను సెన్సార్ వద్ద ఉపయోగించి ఉష్ణోగ్రతను కృత్రిమంగా పెంచి ఉండవచ్చని కొందరు వాతావరణ నిపుణులు ఫోరమ్‌లలో అనుమానం వ్యక్తం చేశారు. అయితే, దీనిపై ఇంకా స్పష్టత రావాల్సి ఉంది.

మెటియో ఫ్రాన్స్ ఫిర్యాదు మేరకు చార్లెస్ డి గాల్ ఎయిర్‌పోర్ట్ పోలీసులు కేసు నమోదు చేసి దర్యాప్తు చేపట్టారు. కాగా, పాలీమార్కెట్ వివాదాల్లో చిక్కుకోవడం ఇది మొదటిసారి కాదు. గతంలో ఇరాన్‌పై అమెరికా, ఇజ్రాయెల్ సైనిక చర్యలను కచ్చితంగా అంచనా వేసి ఒక ట్రేడర్ దాదాపు మిలియన్ డాలర్లు సంపాదించడం ఇన్సైడర్ ట్రేడింగ్ ఆరోపణలకు దారితీసింది. తాజా ఘటనతో వాతావరణ డేటా భద్రతపై కూడా కొత్త ఆందోళనలు వ్యక్తమవుతున్నాయి.