యుద్ధ సమయంలో భారీ ఆర్జన.. చమురు ద్వారా ఇరాన్ రోజువారీ ఆదాయం రూ.1310 కోట్లు

అమెరికా, ఇజ్రాయెల్‌తో ఓపక్క యుద్ధం జరుగుతున్నా, మరోపక్క ఇరాన్‌కు చమురు ఆదాయం మాత్రం పెరుగుతోంది. యుద్ధం ప్రారంభమైనప్పటి నుంచి చమురు విక్రయాల ద్వారా ఇరాన్ వందల మిలియన్ల డాలర్ల అదనపు ఆదాయాన్ని ఆర్జించినట్లు తెలుస్తోంది. హర్మూజ్ జలసంధిని ఉపయోగించుకోగలుగుతున్న ఏకైక ప్రధాన ఎగుమతిదారుగా ఇరాన్ మారడంతో పెరిగిన ముడి చమురు ధరల వల్ల టెహ్రాన్ భారీగా లాభపడుతోంది.

యుద్ధం కారణంగా ఇరాన్ రెట్టింపు ప్రయోజనం పొందుతోంది. అంతర్జాతీయ మార్కెట్‌లో బ్రెంట్ క్రూడ్ ధర బ్యారెల్‌కు 100 డాలర్లు దాటగా, ఇరాన్ తన చమురును గత 10 నెలల్లో ఎన్నడూ లేనంత తక్కువ డిస్కౌంట్‌కు విక్రయిస్తోంది. ఆశ్చర్యకరంగా, ఇరాన్ ఆర్థిక జీవనాడి అయిన చమురు మౌలిక సదుపాయాలపై అమెరికా దాడులు చేయడం లేదు. పైగా, ప్రపంచ ధరలను నియంత్రించేందుకు సముద్రంలోని ట్యాంకర్లపై ఉన్న ఇరాన్ చమురుపై ఆంక్షలను వాషింగ్టన్ తాత్కాలికంగా నిలిపివేయడం టెహ్రాన్‌కు మరింత కలిసొచ్చింది. "ట్రంప్ ప్రభుత్వం ఆచరణాత్మకంగా ఇరాన్‌ను చమురు అమ్మమని అడుగుతోంది" అని కొలంబియా యూనివర్సిటీ నిపుణుడు రిచర్డ్ నెఫ్యూ వ్యాఖ్యానించారు.

Tankertrackers.com అంచనాల ప్రకారం.. ఇరాన్ రోజువారీ చమురు ఆదాయం ఫిబ్రవరిలో 115 మిలియన్ డాలర్ల నుంచి మార్చిలో 139 మిలియన్ డాలర్లు (దాదాపు రూ. 1310 కోట్లు) పెరిగింది. ఎగుమతులు రోజుకు సుమారు 1.6 మిలియన్ బ్యారెళ్ల వద్ద స్థిరంగా కొనసాగుతున్నాయి. ప్రధాన ఎగుమతి కేంద్రమైన ఖర్గ్ ఐలాండ్‌లో కార్యకలాపాలు నిరాటంకంగా సాగుతున్నాయి.

ఇందుకు పూర్తి విరుద్ధంగా, ఇతర గల్ఫ్ దేశాలైన ఇరాక్, కువైట్, యూఏఈ, సౌదీ అరేబియా చమురు ఎగుమతులు యుద్ధం వల్ల తీవ్రంగా దెబ్బతిన్నాయి. మరోవైపు, చర్చలు జరుగుతున్నాయని అమెరికా అధ్యక్షుడు ట్రంప్ ప్రకటించినా, ఇరాన్ అధికారులు మాత్రం అలాంటిదేమీ లేదని ఖండించారు. అమెరికా కాల్పుల విరమణ ప్రతిపాదనను తిరస్కరిస్తూ దాడులను కొనసాగిస్తున్నారు.