పవన్ బాబాయ్‌లో ఆ కోణం చాలామందికి తెలియదు: సుస్మిత కొణిదెల

మెగాస్టార్ చిరంజీవి కుమార్తె సుస్మిత కొణిదెల, ఫ్యాషన్ డిజైనర్‌గా తన ప్రస్థానాన్ని ప్రారంభించి ఇప్పుడు నిర్మాతగానూ చిత్ర పరిశ్రమలో తనదైన ముద్ర వేస్తున్నారు. చిరంజీవితో "మన శంకర వరప్రసాద్ గారు" వంటి ప్రాజెక్టులతో నిర్మాతగానూ ఆమె గుర్తింపు పొందారు. ఇటీవల ఓ టెలివిజన్ ఛానల్‌కు ఇచ్చిన ఇంటర్వ్యూలో తన బాబాయ్, జనసేన అధినేత పవన్ కల్యాణ్‌తో తనకున్న అనుబంధం గురించి పలు ఆసక్తికర విషయాలను పంచుకున్నారు. చిన్నప్పటి జ్ఞాపకాలను గుర్తుచేసుకుంటూ ఆయన గురించి మాట్లాడారు.

పవన్ కల్యాణ్ తమకు కేవలం బాబాయ్ మాత్రమే కాదని, ఒక అన్నలా, స్నేహితుడిలా ఉండేవారని సుస్మిత గుర్తుచేసుకున్నారు. చిన్నప్పుడు తమకు హాలీవుడ్ చిత్రాలపై ఆసక్తి కలిగించింది ఆయనేనని.. 'ది గాడ్‌ఫాదర్', 'స్టార్ వార్స్' వంటి క్లాసిక్ సినిమాలను పరిచయం చేశారని తెలిపారు. అంతేకాకుండా అప్పట్లో ఇంగ్లీష్ సంగీతాన్ని కూడా వినిపించి తమకు ఓ కొత్త ప్రపంచాన్ని చూపించారని ఆమె వివరించారు.

చిన్నప్పటి సరదా సంఘటనలను గుర్తుచేసుకుంటూ, రాత్రి సమయాల్లో పవన్ కల్యాణ్ తమ పిల్లలందరినీ కూర్చోబెట్టి హారర్ కథలు చెప్పేవారని సుస్మిత నవ్వుతూ చెప్పారు. "నన్ను, రామ్ చరణ్‌ను, ఇంట్లో ఉన్న ఇతర పిల్లలను కూర్చోబెట్టి బాబాయ్ దెయ్యం కథలు చెబుతుండేవారు. నాకు హారర్ కథలంటే ఇష్టం కావడంతో ఆసక్తిగా వినేదాన్ని. కానీ, మిగతా పిల్లలు మాత్రం భయంతో మధ్యలోనే కథల నుంచి లేచి వెళ్లిపోయేవారు" అని ఆమె అన్నారు.

పవన్ కల్యాణ్ వ్యక్తిత్వం గురించి మాట్లాడుతూ, ఆయన ఏ వస్త్రధారణ ఎంచుకున్నా అది ఒక ట్రెండ్ సెట్టర్‌గా మారుతుందని, ఆయన స్టైల్‌కు ప్రత్యేకమైన అభిమానులున్నారని సుస్మిత కొనియాడారు. అయితే, చాలామందికి తెలియని మరో కోణం ఆయనలో ఉందని, ఆయనలో ఆధ్యాత్మికత, తాత్విక చింతన చాలా ఎక్కువగా ఉంటాయని, ఆ విషయాలు తమను ఎప్పుడూ ఆశ్చర్యపరుస్తాయని ఆమె వెల్లడించారు. ప్రస్తుతం సుస్మిత చేసిన ఈ వ్యాఖ్యలు సోషల్ మీడియాలో వైరల్‌గా మారాయి. పవన్ కల్యాణ్ వ్యక్తిగత జీవితం, కుటుంబంతో ఆయనకున్న బలమైన బంధం గురించి తెలియడంతో మెగా అభిమానులు సంతోషం వ్యక్తం చేస్తున్నారు.