అమితాబ్ బచ్చన్ నివాసంలో గోల్డెన్ టాయిలెట్... 2016 నాటి సెల్ఫీ వైరల్

 బాలీవుడ్ మెగాస్టార్ అమితాబ్ బచ్చన్ ఇంట్లో బంగారు టాయిలెట్ (గోల్డెన్ టాయిలెట్) ఉందా? అవుననే అంటున్నాడు నటుడు విజయ్ వర్మ. ఏకంగా దాని ముందు నిలబడి ఓ సెల్ఫీ కూడా దిగాడు. 2016లో తీసిన ఆ ఫోటోను ఇప్పుడు సోషల్ మీడియాలో షేర్ చేయడంతో అది కాస్తా వైరల్‌గా మారింది. తన కెరీర్‌కు, వ్యక్తిగత జీవితానికి 2016 ఎంతో కీలకమైన సంవత్సరమని చెబుతూ విజయ్ వర్మ ఆదివారం కొన్ని పాత జ్ఞాపకాలను పంచుకున్నారు.

ఈ పోస్ట్‌లో భాగంగా అమితాబ్ బచ్చన్ ఇంటి బాత్రూంలో ఉన్న గోల్డెన్ టాయిలెట్‌తో తాను దిగిన సెల్ఫీని ఆయన అభిమానులతో పంచుకున్నారు. "2016 నాకు ఒక మైలురాయి లాంటిది. బిగ్ బీ, షూజిత్ సర్కార్‌లతో కలిసి 'పింక్' సినిమాలో పనిచేశాను. నా దేవుడు సచిన్ టెండూల్కర్‌ను కలిశాను. బచ్చన్ గారి ఇంట్లో గోల్డెన్ టాయిలెట్‌తో సెల్ఫీ దిగాను," అని తన పోస్ట్‌లో రాసుకొచ్చారు.

ఇదే పోస్ట్‌లో అమితాబ్‌తో కలిసి దిగిన ఫోటోతో పాటు, క్రికెట్ దిగ్గజం సచిన్ టెండూల్కర్‌ను కలిసినప్పటి చిత్రాన్ని కూడా షేర్ చేశారు. దివంగత నటుడు ఇర్ఫాన్ ఖాన్‌ను తన హీరోగా అభివర్ణిస్తూ ఆయనతో దిగిన ఫోటోను కూడా పంచుకున్నారు. 'పింక్' సినిమా తన కెరీర్‌లో ఒక ముఖ్యమైన అడుగని, అమితాబ్ లాంటి లెజెండ్‌తో పనిచేయడం గొప్ప అభ్యసన దశ అని విజయ్ పేర్కొన్నారు. ఆ చిత్రంలో తన నెగటివ్ పాత్ర కోసం చాలా కష్టపడ్డానని, ఆ సన్నివేశం చూశాక అమ్మాయిలకు చెంపదెబ్బ కొట్టాలనిపించకపోతే సరిగ్గా నటించనట్లేనని దర్శకుడు చెప్పిన మాటలను విజయ్ గుర్తుచేసుకున్నారు.