29 ఏళ్ల నాటి 'న్యూ ఇయర్' జ్ఞాపకం.. 90వ దశకంలో ఇండియన్స్ ఎంత 'కూల్'గా ఉండేవారో తెలుసా?

నూతన సంవత్సరం 2026 వేడుకల వేళ, ఇంటర్నెట్‌లో ఒక పాత వీడియో నెటిజన్లను గతంలోకి తీసుకెళ్తోంది. దాదాపు మూడు దశాబ్దాల క్రితం (1997లో) సాధారణ భారతీయులు తమ నూతన సంవత్సర తీర్మానాల గురించి ఎంత సరదాగా, నిజాయతీగా మాట్లాడేవారో ఈ వీడియో గుర్తు చేస్తోంది. ప్రముఖ నటుడు శేఖర్ సుమన్ హోస్ట్ చేసిన పాప్యులర్ టాక్ షో ‘మూవర్స్ అండ్ షేకర్స్’లోని ఒక చిన్న క్లిప్ ఇప్పుడు ఇన్‌స్టాగ్రామ్‌లో లక్షలాది మంది మనసు గెలుచుకుంది.

ఆ వీడియోలోని కొన్ని సమాధానాలు ఇప్పటికీ మనకు ఎంతో దగ్గరగా అనిపిస్తాయి. ఒక మహిళ తాను ఆ ఏడాది కఠినమైన డైట్ చేస్తానని, స్వీట్లు, చాట్ ముట్టనని చెబుతూనే.. మరుక్షణమే నాలుగు ప్లేట్ల పావ్ భాజీని ఎక్స్‌ట్రా బటర్‌తో ఆర్డర్ చేయడం నవ్వులు పూయిస్తోంది. మరో యువతి "నాకు వీలైనంత మంది బాయ్‌ఫ్రెండ్స్ కావాలి" అని సరదాగా చెప్పగా, ఒక వ్యక్తి ‘నెలకు కనీసం ఒక గర్ల్‌ఫ్రెండ్ ఉండాలి’ అని తన కోరికను బయటపెట్టాడు. ఒక చిన్నారి ‘నేను ఇక నుంచి స్కూల్‌కు పుస్తకాలు తీసుకెళ్లను’ అని తన అమాయకమైన తీర్మానాన్ని చెప్పుకొచ్చాడు.

ఈ వీడియోపై స్పందిస్తున్న నెటిజన్లు 90వ దశకంలోని మనుషుల జీవనశైలిని మెచ్చుకుంటున్నారు. "అప్పటి మనుషులు ఎంత తెలివైన వారు, హుందాగా ఉండేవారు!" అని ఒక యూజర్ కామెంట్ చేయగా, ‘నేటి కాలంలో ఏ చిన్న మాట అన్నా ఒకరిపై ఒకరు విరుచుకుపడుతున్నారు. కానీ అప్పట్లో ఇలాంటి ఫన్నీ సమాధానాలను కూడా ఎంతో పాజిటివ్‌గా తీసుకునేవారు’ అని మరొకరు రాశారు. ముఖ్యంగా అప్పట్లో సాధారణ మనుషులు కూడా ఎంతో స్పష్టంగా, ఆత్మవిశ్వాసంతో ఇంగ్లిష్ మాట్లాడటం చూసి ఇప్పటి తరం షాక్ అవుతోంది.

స్మార్ట్‌ఫోన్లు, వాట్సాప్ ఫార్వర్డ్‌లు లేని ఆ కాలంలో మనుషుల మధ్య ఉన్న సహజమైన సంతోషానికి ఈ వీడియో అద్దం పడుతోంది. నూతన సంవత్సర వేడుకలు జరుపుకుంటున్న నేటి తరం ఈ వీడియోను చూసి, ‘నిజంగా ఆ రోజులే గోల్డెన్ డేస్’ అని కొనియాడుతున్నారు.