టాటా, మహీంద్రా, హ్యూందాయ్ ఈవీలపై భారీ తగ్గింపు... ఏ మోడల్‌పై ఎంతంటే..?

దేశంలో ఎలక్ట్రిక్ కార్ల మార్కెట్ కొంతకాలంగా స్తబ్దుగా ఉంది. ఈ నేపథ్యంలో అమ్మకాలను తిరిగి గాడిన పెట్టేందుకు ప్రముఖ కార్ల తయారీ సంస్థలు రంగంలోకి దిగాయి. టాటా మోటార్స్, మహీంద్రా, హ్యూందాయ్, కియా వంటి కంపెనీలు తమ ఎలక్ట్రిక్ వాహనాలపై రికార్డు స్థాయిలో ఇయర్ ఎండ్ డిస్కౌంట్లను ప్రకటించాయి. కొన్ని మోడళ్లపై ఏకంగా రూ.7 లక్షల వరకు ప్రయోజనాలను అందిస్తున్నాయి.

ఇటీవల పెట్రోల్, డీజిల్ కార్లపై జీఎస్టీని ప్రభుత్వం తగ్గించడంతో వాటి ధరలు దిగివచ్చాయి. దీంతో కొనుగోలుదారులు వాటి వైపే మొగ్గు చూపారు. ఫలితంగా ఎలక్ట్రిక్ వాహనాల అమ్మకాలు గణనీయంగా పడిపోయాయి. ఈ క్రమంలో సంవత్సరం చివరిలో అమ్మకాలను పెంచుకోవడమే లక్ష్యంగా కంపెనీలు ఈ డిస్కౌంట్ వ్యూహాన్ని అమలు చేస్తున్నాయి.

ఈవీ మార్కెట్లో అగ్రగామిగా ఉన్న టాటా మోటార్స్ తన కర్వ్ ఆర్ఎస్ మోడల్‌పై గరిష్ఠంగా రూ.3.50 లక్షల వరకు డిస్కౌంట్ ప్రకటించింది. అలాగే టాటా పంచ్ ఈవీపై రూ.1.75 లక్షలు, నెక్సాన్ ఈవీపై రూ.1.50 లక్షలు, టియాగో ఈవీపై రూ.1.65 లక్షల వరకు తగ్గింపును అందిస్తోంది. మరోవైపు మహీంద్రా అండ్ మహీంద్రా తన ఎక్స్‌యూవీ 9ఇ కారుపై రూ.3.50 లక్షలు, బీఈ6 మోడల్‌పై రూ.2.50 లక్షల వరకు ప్రయోజనాలను ఇస్తోంది.

ఇక, ఇతర కంపెనీల విషయానికొస్తే, హ్యూందాయ్ తన ఐయానిక్ 6 కారుపై ఏకంగా రూ.7 లక్షల వరకు భారీ తగ్గింపును అందిస్తోంది. కియా ఈవీ6పై రూ.1.20 లక్షల వరకు బెనిఫిట్స్ ఉన్నాయి. ఎంజీ మోటార్ కూడా తన కామెంట్‌ ఈవీపై రూ.1 లక్ష, జెడ్‌ఎస్ ఈవీపై రూ.1.35 లక్షల వరకు ప్రయోజనాలను ప్రకటించింది. ఈ డిస్కౌంట్లలో నగదు తగ్గింపు, ఎక్స్ఛేంజ్ బోనస్, కార్పొరేట్ ప్రయోజనాలు వంటివి కలిపి ఉంటాయని కంపెనీలు వెల్లడించాయి.