గురుకులంలో దారుణం.. విద్యార్థినిపై మహిళా వైస్ ప్రిన్సిపాల్ లైంగిక వేధింపులు!

విద్యార్థులకు రక్షణగా నిలవాల్సిన గురుకుల పాఠశాలలో దారుణ ఘటన చోటుచేసుకుంది. పదో తరగతి చదువుతున్న విద్యార్థినిపై మహిళా వైస్ ప్రిన్సిపాల్ లైంగిక వేధింపులకు పాల్పడిన ఉదంతం మహబూబ్‌నగర్ జిల్లా జడ్చర్లలో తీవ్ర కలకలం రేపింది. ఈ దారుణాన్ని కప్పిపుచ్చేందుకు ప్రయత్నించిన ప్రిన్సిపాల్‌తో పాటు, వైస్ ప్రిన్సిపాల్‌పై పోలీసులు పోక్సో చట్టం కింద కేసు నమోదు చేశారు.

వివరాల్లోకి వెళితే.. జడ్చర్ల మండల కేంద్రంలోని ఓ గురుకుల పాఠశాలలో పదో తరగతి చదువుతున్న విద్యార్థినిపై వైస్ ప్రిన్సిపాల్ రాజ్యలక్ష్మి కొంతకాలంగా లైంగిక వేధింపులకు పాల్పడుతోంది. ఇటీవల పాఠశాలలో నిర్వహించిన షీ టీమ్స్ అవగాహన కార్యక్రమంతో ధైర్యం తెచ్చుకున్న విద్యార్థిని, తనపై జరుగుతున్న అఘాయిత్యాన్ని అధికారుల దృష్టికి తీసుకెళ్లింది. దీంతో ఈ దారుణం వెలుగులోకి వచ్చింది.

బాధిత విద్యార్థిని తల్లిదండ్రుల ఫిర్యాదు మేరకు పోలీసులు రంగంలోకి దిగారు. విచారణలో వైస్ ప్రిన్సిపాల్ రాజ్యలక్ష్మి ఆగస్టు నెల నుంచే ఈ వేధింపులకు పాల్పడుతున్నట్లు తేలిందని డీఎస్పీ వెల్లడించారు. నైట్ డ్యూటీ సమయంలో ఆమె విద్యార్థినిని శారీరకంగా, లైంగికంగా వేధించినట్లు తెలిపారు. ఈ విషయాన్ని బయటకు పొక్కకుండా ప్రిన్సిపాల్ రజిని రాగమాల బాధితురాలిని, ఆమె తల్లిదండ్రులను బెదిరించినట్లు కూడా పోలీసులు గుర్తించారు.

ఈ ఘటనపై తీవ్రంగా స్పందించిన ఉన్నతాధికారులు, వైస్ ప్రిన్సిపాల్ రాజ్యలక్ష్మి, ప్రిన్సిపాల్ రజిని రాగమాల ఇద్దరినీ తక్షణమే సస్పెండ్ చేస్తూ ఉత్తర్వులు జారీ చేశారు. ప్రస్తుతం వారిద్దరిపై పోక్సో చట్టం కింద కేసు నమోదు చేసి పోలీసులు లోతైన దర్యాప్తు కొనసాగిస్తున్నారు.