పవన్ చేతబడి మాంత్రికుడిలా మాట్లాడుతున్నారు: పేర్ని నాని

డిప్యూటీ సీఎం పవన్ కల్యాణ్ ఓ చేతబడి మాంత్రికుడిలా మాట్లాడుతున్నారంటూ వైసీపీ నేత, మాజీ మంత్రి పేర్ని నాని తీవ్రస్థాయిలో విరుచుకుపడ్డారు. కోనసీమలో కొబ్బరి చెట్లు ఎండిపోవడానికి 'కళ్ల దిష్టి' తగలడమే కారణమని పవన్ చేసిన వ్యాఖ్యలపై ఆయన మంగళవారం ఘాటుగా స్పందించారు. డిప్యూటీ సీఎం హోదాలో ఉన్న వ్యక్తి ఇలాంటి మూఢనమ్మకాలను ప్రచారం చేయడం దారుణమని, ఆయన హోదా ఏమిటో స్పష్టం చేయాలని సవాల్ విసిరారు.

"పవన్ కల్యాణ్ డిప్యూటీ సీఎంగా మాట్లాడారా, లేక చేతబడి మాంత్రికుడి హోదాలో మాట్లాడారా? అసలు దిష్టి తగలడం అంటే ఏమిటి? రాష్ట్ర విభజన జరిగి తెలంగాణ ఏర్పడటమే దిష్టి తగలడమా? పవన్‌కు చేతబడి విద్యలు కూడా తెలుసేమో" అంటూ పేర్ని నాని ఎద్దేవా చేశారు. టెక్నాలజీ ఇంతగా అభివృద్ధి చెందిన ఈ రోజుల్లో కూడా దిష్టి, మంత్రాలు, చేతబడులు అంటూ ప్రజలను తప్పుదోవ పట్టించడం సరికాదన్నారు. ప్రభుత్వం వెంటనే శాస్త్రవేత్తలతో ఒక కమిటీ వేసి, కొబ్బరి చెట్లకు సోకిన వ్యాధిని గుర్తించి, వాటిని బతికించేందుకు చర్యలు తీసుకోవాలని సూచించారు. రైతుల జీవనోపాధిని కాపాడాల్సిన బాధ్యత ప్రభుత్వంపై ఉందని గుర్తుచేశారు.

పరిపాలనపై దృష్టి సారించకుండా పవన్ కల్యాణ్ ఇలాంటి వ్యాఖ్యలు చేయడం విడ్డూరంగా ఉందని నాని విమర్శించారు. తెలంగాణలో రైతులు ఏపీతో పోటీపడి వరి, ఉద్యానవన పంటలు పండిస్తుంటే, ఇక్కడ మాత్రం పాలకులు ఇలా మాంత్రిక ప్రసంగాలు చేస్తున్నారని దుయ్యబట్టారు. చంద్రబాబు, పవన్ కల్యాణ్ కేవలం తమపై ఉన్న కేసులను మాఫీ చేసుకోవడానికి, దోచుకోవడానికే అధికారంలోకి వచ్చారని ఆరోపించారు.

ఈ సందర్భంగా పవన్ కల్యాణ్ వ్యక్తిగత ఇమేజ్‌ను కూడా నాని టార్గెట్ చేశారు. "పవన్ కల్యాణ్ సినిమాలకు మ్యాట్నీ షోలకు కూడా జనం వెళ్లడం లేదు. ఆయనను నమ్మి సినిమాలు తీసిన నిర్మాతలు రోడ్డున పడ్డారు. ఇప్పటికీ ఆ సినిమాలకు సంబంధించిన జీఎస్టీ కూడా కట్టలేదు" అని ఆరోపించారు. చంద్రబాబు, పవన్ కల్యాణ్ చేసిన దుర్మార్గపు ప్రచారాలను ప్రజలు నమ్మారని, అయితే ఇప్పుడు వారి మోసాన్ని గ్రహించారని, తగిన సమయంలో కచ్చితంగా గుణపాఠం చెబుతారని పేర్ని నాని హెచ్చరించారు. మొత్తంగా పవన్ కల్యాణ్ వ్యాఖ్యలు ఆయన అపరిపక్వతకు, పరిపాలనపై అవగాహన లేమికి నిదర్శనమని నాని అభిప్రాయపడ్డారు.

ఆ విషయంలో చంద్రబాబు దిట్ట!

అదే సమయంలో పేర్ని నాని ముఖ్యమంత్రి చంద్రబాబుపైనా తీవ్రస్థాయిలో విమర్శలు గుప్పించారు. దేశంలో తప్పుడు, దిగజారుడు రాజకీయాలు చేయడంలో చంద్రబాబు దిట్ట అని, ఎప్పటికప్పుడు వింత పోకడలతో ముందుకెళతారని మండిపడ్డారు. 

గతంలో ఒక పార్టీలో గెలిచి మరో పార్టీలోకి వెళ్లేవారని, కానీ ఇప్పుడు చంద్రబాబు డబ్బులిచ్చి పదవులు కొనుక్కునే కొత్త సంప్రదాయానికి తెరలేపారని ఆరోపించారు. ముందుగానే బేరం కుదుర్చుకుని, అడ్వాన్సులు ఇచ్చి రాజీనామాలు చేయించి, ఆ తర్వాత వారికి పదవులు కట్టబెడుతున్నారని విమర్శించారు. ఎన్టీఆర్ హయాం నుంచే చంద్రబాబుకు కుట్ర రాజకీయాలు అలవాటని, ప్రజాస్వామ్యం, విలువలను ఆయన పట్టించుకోరని దుయ్యబట్టారు. 

ఇక, చంద్రబాబు తనపై ఉన్న కేసుల విషయంలో అధికారాన్ని దుర్వినియోగం చేస్తున్నారని పేర్ని నాని ఆరోపించారు. వైద్యం చేయించుకోకపోతే చనిపోతానంటూ బెయిల్ తెచ్చుకుని ఇప్పటికీ ఆసుపత్రికి వెళ్లలేదని, అధికారులను బెదిరించి కేసులు మాఫీ చేయించుకుంటున్నారని విమర్శించారు. 

అంతేకాకుండా, అమరావతిని చంపేసింది చంద్రబాబేనని, ఈ కుట్ర వెనుక ఉన్నది ఆయనేనని రాజధాని రైతులే అంటున్నారని పేర్కొన్నారు. పరిశ్రమలన్నీ వైజాగ్‌కు తరలిపోతుంటే అమరావతిలో భూముల ధరలు ఎలా పెరుగుతాయని ప్రశ్నించారు. అధికారంలోకి వచ్చింది కేవలం దోచుకోవడానికేనని, దోచిన సొమ్మును దుబాయ్‌లో దాచుకుంటున్నారని ఆరోపించారు. దొంగ సర్టిఫికెట్ తెచ్చుకున్నంత మాత్రాన చంద్రబాబు పునీతుడు కాలేరని, కచ్చితంగా ఆయనపై ప్రకృతి తిరగబడుతుందని, అప్పుడు ఇదే కోర్టులు ఆయన్ను జైలుకు పంపుతాయని పేర్ని నాని స్పష్టం చేశారు.