సీసీఐ అధికారుల తీరుపై సీఎం చంద్రబాబు తీవ్ర ఆగ్రహం

రాష్ట్రంలో పత్తి కొనుగోళ్ల విషయంలో కాటన్ కార్పొరేషన్ ఆఫ్ ఇండియా (సీసీఐ) అధికారులు వ్యవహరిస్తున్న తీరుపై ముఖ్యమంత్రి చంద్రబాబు తీవ్ర ఆగ్రహం వ్యక్తం చేశారు. యాప్ ద్వారా స్లాట్ బుకింగ్ చేసుకున్నప్పటికీ రైతులు తీవ్ర ఇబ్బందులు ఎదుర్కొంటున్నారన్న విషయంపై ఆయన మండిపడ్డారు. ఎట్టి పరిస్థితుల్లోనూ పత్తి రైతులు నష్టపోవడానికి వీల్లేదని, వారిని ఇబ్బందులకు గురిచేస్తే సహించేది లేదని ఆయన తేల్చి చెప్పారు. ఈ విషయంపై తక్షణమే కేంద్ర ప్రభుత్వానికి లేఖ రాయాలని అధికారులను ఆదేశించారు. శుక్రవారం సచివాలయంలో వ్యవసాయ, ఉద్యాన, మార్కెటింగ్ శాఖలపై నిర్వహించిన సమీక్షా సమావేశంలో ఈ ఘటన చోటుచేసుకుంది. రైతులకు సంబంధించిన ఏ విషయంలోనూ నిర్లక్ష్యం తగదని అధికారులకు ఆయన గట్టిగా హెచ్చరించారు.

ఈ సమీక్షలో కేవలం పత్తి రైతుల సమస్యలకే పరిమితం కాకుండా, వ్యవసాయ రంగంలోని ఇతర కీలక అంశాలపై కూడా ముఖ్యమంత్రి కీలక ఆదేశాలు జారీ చేశారు. ఆన్‌లైన్ ద్వారా ఈ సమావేశానికి హాజరైన వ్యవసాయ శాఖ మంత్రి కింజరాపు అచ్చెన్నాయుడు, ఇతర ఉన్నతాధికారులతో ఆయన పలు అంశాలపై చర్చించారు. 

రాష్ట్రవ్యాప్తంగా 175 నియోజకవర్గాల్లో ఏర్పాటు చేస్తున్న ఎంఎస్ఎంఈ పార్కుల్లో ఫుడ్ ప్రాసెసింగ్ యూనిట్ల ఏర్పాటుకు అధిక ప్రాధాన్యం ఇవ్వాలని చంద్రబాబు ఆదేశించారు. వ్యవసాయ ఉత్పత్తులకు విలువ జోడించడం (వాల్యూ అడిషన్) ద్వారానే రైతులకు గరిష్ఠ ప్రయోజనం చేకూరుతుందని ఆయన స్పష్టం చేశారు.

'రైతన్నా-మీకోసం' కార్యక్రమంలో నేనూ పాల్గొంటా!

ఈ నెల 24 నుంచి 29 వరకు, తిరిగి డిసెంబరు 3న రాష్ట్రవ్యాప్తంగా నిర్వహించనున్న 'రైతన్నా-మీకోసం' కార్యక్రమంలో తాను కూడా స్వయంగా పాల్గొంటానని ముఖ్యమంత్రి ప్రకటించారు. ప్రజాప్రతినిధులు, అధికారులు తప్పనిసరిగా ఈ కార్యక్రమాల్లో పాల్గొని రైతుల వద్దకు వెళ్లాలని సూచించారు. రైతు భరోసా కేంద్రం పరిధిలోని ప్రతి రైతు ఇంటికీ ముఖ్యమంత్రి లేఖను అందించి, ప్రభుత్వం నిర్దేశించిన పంచ సూత్రాలను వివరించాలని ఆదేశించారు. నీటి భద్రత, డిమాండ్‌కు తగిన పంటల సాగు, అగ్రిటెక్ వినియోగం, ఫుడ్ ప్రాసెసింగ్, ప్రభుత్వ పథకాలపై రైతులకు పూర్తిస్థాయిలో అవగాహన కల్పించాలని నిర్దేశించారు.

సాంకేతికత రైతుకు చేరువ కావాలి

వ్యవసాయ శాఖ రూపొందించిన 'ఫార్మర్ యాప్'ను ప్రతి రైతు ఫోన్‌లో ఉండేలా చూడాలని సీఎం సూచించారు. పంట సాగు వివరాలు, వాతావరణ సలహాలు, మార్కెట్ ధరలు, భూసార పరీక్షల వంటి సమాచారాన్ని రియల్ టైంలో అందిస్తేనే రైతులకు ప్రయోజనం ఉంటుందన్నారు. క్షేత్రస్థాయిలో అగ్రికల్చర్, హార్టికల్చర్ అసిస్టెంట్లు అందిస్తున్న సేవలను కొనియాడిన సీఎం, ప్రభుత్వ కార్యక్రమాలను రైతుల వద్దకు తీసుకెళ్లడంలో వారు కీలకపాత్ర పోషించాలని అన్నారు.

అరటి రైతులకు అండగా ఉండాలి

అనంతపురం, కడప, నంద్యాల జిల్లాల్లో అరటి ధరలు పడిపోవడంపై సీఎం ఆరా తీశారు. ఇతర రాష్ట్రాల్లో ఉత్పత్తి పెరగడం, వర్షాల వల్ల ఎగుమతి రకం దెబ్బతినడంతో ధరలు తగ్గాయని అధికారులు వివరించగా, తక్షణమే మార్కెటింగ్ సౌకర్యాలు కల్పించి మద్దతు ధర లభించేలా చూడాలని ఆదేశించారు. పొరుగు రాష్ట్రాలకు ఎగుమతి చేయడంతో పాటు, అవసరమైతే జల, రైలు, ఎయిర్ కార్గో ద్వారా ఉత్పత్తులను రవాణా చేయడానికి చర్యలు తీసుకోవాలని స్పష్టం చేశారు.