ముగిసిన ఏడో రౌండ్ కౌంటింగ్.. ఘన విజయం దిశగా కాంగ్రెస్.. మంత్రి కొండా సురేఖ స్పందన

జూబ్లీహిల్స్ అసెంబ్లీ నియోజకవర్గ ఉపఎన్నిక ఓట్ల లెక్కింపులో కాంగ్రెస్ పార్టీ స్పష్టమైన ఆధిపత్యాన్ని ప్రదర్శిస్తోంది. కౌంటింగ్ ప్రారంభమైనప్పటి నుంచి దూకుడుగా ఉన్న కాంగ్రెస్ అభ్యర్థి నవీన్ యాదవ్... ఏడు రౌండ్లు ముగిసేసరికి భారీ ఆధిక్యంలో కొనసాగుతున్నారు. సమీప ప్రత్యర్థిపై ఆయన ప్రస్తుతం 19,619 ఓట్ల మెజార్టీతో ముందంజలో ఉన్నారు.

ఓట్ల లెక్కింపులో ప్రతి రౌండ్‌లోనూ కాంగ్రెస్ ఆధిక్యం పెరుగుతూ వస్తోంది. ఏడో రౌండ్‌లోనూ ఇదే హవా కొనసాగింది. ఈ ఒక్క రౌండ్‌లోనే నవీన్ యాదవ్‌కు 4,030 ఓట్ల మెజార్టీ లభించడం గమనార్హం. అయితే, ఈ ఫలితాలను ఈసీ ఇంకా అధికారికంగా ప్రకటించాల్సి ఉంది. ఇప్పటివరకు పూర్తయిన అన్ని రౌండ్లలోనూ కాంగ్రెస్ పార్టీదే పైచేయిగా నిలిచింది. ఈ ట్రెండ్‌తో కాంగ్రెస్ శ్రేణుల్లో సంబరాలు అప్పుడే మొదలయ్యాయి.

ఈ ఫలితాలపై మంత్రి కొండా సురేఖ స్పందించారు. నవీన్ యాదవ్ గెలుపు ఎన్నికల ప్రచార సమయంలోనే ఖాయమైందని ఆమె అన్నారు. "గతంలో రెండుసార్లు ఓడిపోయినా, నవీన్ యాదవ్ నిత్యం ప్రజల్లోనే ఉన్నారు. వారి సమస్యలు తెలుసుకుంటూ మంచి పేరు సంపాదించుకున్నారు. అందుకే ప్రజలు ఆయనకు పట్టం కడుతున్నారు" అని అన్నారు. గెలిచిన తర్వాత కూడా ప్రజల మనిషిలాగే ఉండాలని ఆమె నవీన్‌కు సూచించారు. ఈ సందర్భంగా జూబ్లీహిల్స్ ప్రజలకు, ఎన్నికల్లో సహకరించిన ఎంఐఎం శ్రేణులకు మంత్రి సురేఖ కృతజ్ఞతలు తెలిపారు.