ఏపీ మద్యం స్కామ్: ముంబై లింక్‌ను ఛేదించిన సిట్.. 49వ నిందితుడిగా వ్యాపారి

ఆంధ్రప్రదేశ్ లో తీవ్ర సంచలనం సృష్టించిన ఏపీ లిక్కర్ స్కామ్ కేసు దర్యాప్తులో ప్రత్యేక దర్యాప్తు బృందం (సిట్) మరో కీలక ముందడుగు వేసింది. ఈ స్కామ్‌లో కమీషన్ల రూపంలో అక్రమంగా సంపాదించిన నల్లధనాన్ని మనీ లాండరింగ్ ద్వారా తెల్లధనంగా మార్చిన కీలకమైన లింక్‌ను అధికారులు ఛేదించారు. ఈ వ్యవహారంలో ప్రధాన సూత్రధారిగా భావిస్తున్న ముంబైకి చెందిన వ్యాపారి అనిల్ చోఖ్రాను విచారించి, కీలక సమాచారం రాబట్టారు.
 
మనీ లాండరింగ్ కేసుల్లో అనిల్ చోఖ్రాకు పాత నేర చరిత్ర ఉంది. డొల్ల కంపెనీలు సృష్టించి నల్లధనాన్ని చలామణీ చేయడంలో ఆయన సిద్ధహస్తుడని అధికారులు గుర్తించారు. గతంలో ఎన్‌ఫోర్స్‌మెంట్ డైరెక్టరేట్ (ఈడీ) అధికారులు 2017, 2021 సంవత్సరాల్లో రెండు వేర్వేరు కేసుల్లో ఆయనను అరెస్టు చేశారు. బెయిల్‌పై బయటకు వచ్చిన ఆయన్ను గత ప్రభుత్వ పెద్దలు సంప్రదించినట్లు సిట్ దర్యాప్తులో తేలింది. క్రిపటి ఎంటర్‌ప్రైజెస్‌, నైస్‌నా మల్టీ వెంచర్స్‌ వంటి నాలుగు డొల్ల కంపెనీల ద్వారా వందల కోట్ల రూపాయల లావాదేవీలు జరిపినట్లు ఆధారాలు లభించాయి.
 
విశ్వసనీయ సమాచారం మేరకు..  రెండు రోజుల క్రితం సిట్ అధికారులు ముంబై వెళ్లి, సేకరించిన సాంకేతిక ఆధారాలను అనిల్ చోఖ్రా ముందు ఉంచారు. ఎవరెవరితో సంప్రదింపులు జరిపారనే వివరాలు సహా అన్ని ఆధారాలు చూపడంతో, ఆయన నేరాన్ని అంగీకరించినట్లు తెలిసింది. మద్యం స్కామ్‌లో వచ్చిన వందల కోట్ల రూపాయలను తన డొల్ల కంపెనీల ద్వారా తెల్లధనంగా మార్చినట్లు ఆయన ఒప్పుకున్నారని సమాచారం.
 
దీంతో సిట్ అధికారులు అనిల్ చోఖ్రాను ఈ కేసులో 49వ నిందితుడిగా చేర్చారు. ఈ మేరకు విజయవాడ ఏసీబీ కోర్టులో మెమో దాఖలు చేశారు. ఇప్పటికే ఈ కేసులో 48 మంది నిందితులుగా ఉండగా, 12 మందికి పైగా అరెస్ట్ అయ్యారు. కొందరు బెయిల్‌పై బయట ఉండగా, చెవిరెడ్డి భాస్కర్‌ రెడ్డి, రాజ్‌ కసిరెడ్డి వంటి కీలక నిందితులు బెయిల్ లభించక ఇంకా జైల్లోనే ఉన్నారు. తాజా పరిణామాల నేపథ్యంలో సిట్ అధికారులు త్వరలోనే అనిల్ చోఖ్రాను అరెస్టు చేసే అవకాశాలు ఉన్నట్లు తెలుస్తోంది.