తల్లి శ్రీదేవి కోసం రాసిన కవితను చదివి వినిపించిన జాన్వీ కపూర్

దివంగత నటి, అతిలోక సుందరి శ్రీదేవిని గుర్తుచేసుకుని ఆమె కుమార్తె, బాలీవుడ్ నటి జాన్వీ కపూర్ తీవ్ర భావోద్వేగానికి గురయ్యారు. తన తల్లిపై ప్రేమతో స్వయంగా రాసుకున్న ఒక కవితను ఓ టాక్ షోలో చదివి వినిపించి అందరినీ కదిలించారు. ఈ సంఘటనతో ఆమె తన తల్లిని ఎంతగా మిస్ అవుతున్నారో మరోసారి స్పష్టమైంది.

నటులు ట్వింకిల్ ఖన్నా, కాజోల్ హోస్ట్‌లుగా వ్యవహరిస్తున్న "టూ మచ్ విత్ కాజోల్ అండ్ ట్వింకిల్" అనే కార్యక్రమానికి జాన్వీ కపూర్, కరణ్ జోహార్‌తో కలిసి హాజరయ్యారు. ఈ సందర్భంగా తన తల్లిని ఉద్దేశించి రాసిన కవితను ఆమె చదివారు.

"బచీ థీ ఫిర్ అచానక్ ఏక్ దిన్ వో హఖ్ ఖో దియా, జో లాడ్ మాంగ్తీ థీ ఉస్సే ముహ్ మోడ్ లియా, అప్నీ ఆవాజ్ ఖో కే అప్నీ మా కీ ఆవాజ్ మే బాత్ కర్తీ హూ, ఇసీ జరియే మే ఉన్కే పాస్ భీ రఖ్తీ హూ," అంటూ ఆమె కవితను వినిపించారు. (నేనొక చిన్నపిల్లని, కానీ అకస్మాత్తుగా ఆ హక్కును కోల్పోయాను. ఎవరి ప్రేమ కోరుకున్నానో, వారికే దూరమయ్యాను. నా సొంత గొంతును కోల్పోయి, ఇప్పుడు అమ్మ గొంతుతో మాట్లాడుతున్నాను. ఈ రూపంలోనే ఆమెను నా దగ్గర ఉంచుకుంటున్నాను) అని ఆ కవిత సారాంశం.

2018 ఫిబ్రవరి 24న దుబాయ్‌లో ప్రమాదవశాత్తు బాత్‌టబ్‌లో మునిగి శ్రీదేవి (54) మరణించిన సంగతి తెలిసిందే. జాన్వీ తొలి చిత్రం 'ధడక్' విడుదలకు కొన్ని నెలల ముందే ఆమె కన్నుమూయడం దేశవ్యాప్తంగా అభిమానులను తీవ్ర దిగ్భ్రాంతికి గురిచేసింది. శ్రీదేవి మరణానంతరం, ఆమె భర్త బోనీ కపూర్ మొదటి భార్య పిల్లలైన అర్జున్ కపూర్, అన్షులా కపూర్.. తమ సోదరీమణులు జాన్వీ, ఖుషీ కపూర్‌లకు అండగా నిలుస్తూ వస్తున్నారు.

శ్రీదేవి తర్వాత జాన్వీ 'గుంజన్ సక్సేనా', 'గుడ్ లక్ జెర్రీ', 'మిలీ', 'బవాల్', 'మిస్టర్ అండ్ మిసెస్ మహి' వంటి చిత్రాలతో నటిగా మంచి గుర్తింపు తెచ్చుకున్నారు. ఆమె చెల్లెలు ఖుషీ కపూర్ కూడా 2023లో 'ది ఆర్చీస్' సినిమాతో అరంగేట్రం చేశారు.

ఇటీవల జాన్వీ కపూర్ నటించిన 'సన్నీ సంస్కారీ కీ తులసీ కుమారి' చిత్రం వంద కోట్ల క్లబ్‌లో చేరింది. వరుణ్ ధావన్, రోహిత్ సరాఫ్, సానియా మల్హోత్రా కీలక పాత్రల్లో నటించిన ఈ సినిమాకు మిశ్రమ స్పందనలు వచ్చినప్పటికీ, ఇందులో జాన్వీ నటనకు విమర్శకుల నుంచి ప్రశంసలు లభించాయి.