చెన్నైలోని ఉప రాష్ట్రపతి నివాసానికి బాంబు బెదిరింపు

తమిళనాడులో బాంబు బెదిరింపుల పరంపర కొనసాగుతూనే ఉంది. తాజాగా శుక్రవారం చెన్నైలో ఏకంగా ఉపరాష్ట్రపతి సీపీ రాధాకృష్ణన్ నివాసానికి బాంబు బెదిరింపు రావడం తీవ్ర కలకలం సృష్టించింది. రాష్ట్ర డీజీపీ కార్యాలయానికి అందిన ఒక ఈ-మెయిల్‌లో, ఉపరాష్ట్రపతి నివాసంలో బాంబు అమర్చినట్లు ఆగంతుకులు హెచ్చరించారు.

ఈ సమాచారం అందుకున్న వెంటనే ఉన్నతాధికారులు అప్రమత్తమయ్యారు. హుటాహుటిన బాంబ్ స్క్వాడ్ బృందాలను, పోలీసు బలగాలను ఉపరాష్ట్రపతి నివాసానికి పంపించారు. భవనం మొత్తాన్ని క్షుణ్ణంగా తనిఖీ చేయగా ఎలాంటి పేలుడు పదార్థాలు లభించలేదు. దీంతో అధికారులు ఊపిరి పీల్చుకున్నారు. ఇది కేవలం భయభ్రాంతులకు గురిచేసేందుకు చేసిన బూటకపు బెదిరింపు అని నిర్ధారించారు. ఈ-మెయిల్ పంపిన వారిని గుర్తించేందుకు పోలీసులు దర్యాప్తు ముమ్మరం చేశారు.

ఇదిలా ఉండగా, ఢిల్లీలో ఒక విచిత్రమైన ఘటన వెలుగు చూసింది. పరీక్ష రాయడం ఇష్టం లేక ఓ విద్యార్థి ఏకంగా తాను చదువుతున్న స్కూల్‌కే బాంబు బెదిరింపు పంపాడు. నిన్న విశాల్ భారతి పబ్లిక్ స్కూల్‌కు ఈ-మెయిల్ ద్వారా ఈ బెదిరింపు వచ్చింది. పాఠశాల యాజమాన్యం సమాచారంతో పోలీసులు తనిఖీలు చేపట్టగా, అక్కడ కూడా ఎలాంటి ప్రమాదకర వస్తువులు దొరకలేదు.

సాంకేతిక ఆధారాలతో దర్యాప్తు చేసిన పోలీసులు, అదే పాఠశాలలో చదువుతున్న విద్యార్థే ఈ పని చేసినట్లు గుర్తించారు. విచారణలో, పరీక్షలకు భయపడే ఇలా చేశానని ఆ బాలుడు అంగీకరించాడు. దీంతో పోలీసులు అతడిని మందలించి, తల్లిదండ్రులకు అప్పగించారు.