వ్యక్తిపై వీధికుక్కల గుంపు దాడి.. ఒళ్లు గగుర్పొడిచే సీసీటీవీ దృశ్యాలు

పనికి వెళ్తున్న ఒక వ్యక్తిపై ఏడు వీధి కుక్కలు ఒక్కసారిగా దాడికి తెగబడగా, అతడు చాకచక్యంగా వ్యవహరించి ప్రాణాలతో బయటపడ్డాడు. ఒళ్లు గగుర్పొడిచే ఈ ఘటన మహారాష్ట్రలోని పింప్రి-చించ్‌వాడ్‌లో చోటుచేసుకుంది. ఈ ఘ‌ట‌న‌కు సంబంధించిన దృశ్యాలు సమీపంలోని సీసీటీవీ కెమెరాలో రికార్డయ్యాయి.

వివరాల్లోకి వెళ్తే... శనివారం తెల్లవారుజామున 5 గంటల సమయంలో ఈ సంఘటన జరిగింది. ఓ వ్యక్తి నిర్మానుష్యంగా ఉన్న వీధిలో నడుచుకుంటూ వెళ్తుండగా, ఏడు కుక్కల గుంపు అతడిపైకి దూసుకొచ్చింది. వెంటనే తేరుకున్న ఆ వ్యక్తి, పక్కనే ఉన్న ఓ బైక్‌ను వాటికి అడ్డుగా పెట్టి తనను తాను కాపాడుకునే ప్రయత్నం చేశాడు. కుక్కలు వెనక్కి తగ్గకపోవడంతో, బైక్‌ను వాటిపైకి తోశాడు.

అతడి అరుపులు విన్న స్థానికులు ఇళ్లలో నుంచి బయటకు రావడంతో కుక్కలు అక్కడి నుంచి పారిపోయాయి. అయితే, కాసేపటికే అవి మళ్లీ తిరిగి రావడంతో, ఈసారి బాధితుడు చేతికి దొరికిన ఓ చెక్క దుంగతో వాటిని తరిమికొట్టాడు. ఈ దాడిలో అతడికి గాయాలైనట్లు అధికారులు తెలిపారు. ఈ ఘటనతో తీవ్ర ఆందోళనకు గురైన స్థానిక ప్రజలు, తమ ప్రాంతంలో వీధి కుక్కల బెడదను అరికట్టాలని మున్సిపల్ కార్పొరేషన్‌కు ఫిర్యాదు చేశారు.

దేశవ్యాప్తంగా వీధి కుక్కల దాడులు, రేబిస్ మరణాలు పెరుగుతున్న నేపథ్యంలో సుప్రీంకోర్టు ఇటీవల కీలక ఆదేశాలు జారీ చేసిన సంగతి తెలిసిందే. జంతు జనన నియంత్రణ (ఏబీసీ) నిబంధనల ప్రకారం, వీధి కుక్కలకు స్టెరిలైజేషన్, టీకాలు వేయించి తిరిగి అవే ప్రాంతాల్లో వదిలిపెట్టాలని శుక్రవారం తన ఆదేశాలను సవరించింది. అయితే, రేబిస్ సోకిన లేదా దూకుడుగా ప్రవర్తించే కుక్కలకు ఈ నిబంధన వర్తించదని తేల్చిచెప్పింది. వాటికి ఆహారం అందించేందుకు ప్రత్యేక ఫీడింగ్ కేంద్రాలను ఏర్పాటు చేయాలని కూడా మున్సిపల్ అధికారులను ఆదేశించింది.