చైనాలో భారీ వర్షాలు.. నేపాల్ సరిహద్దులో విధ్వంసం

నేపాల్‌లో పెను విషాదం చోటుచేసుకుంది. చైనా సరిహద్దులో ఉన్న భోటెకోశి నదికి మంగళవారం తెల్లవారుజామున ఆకస్మికంగా భారీ వరద పోటెత్తింది. ఈ జల ప్రళయం ధాటికి నేపాల్-చైనాలను కలిపే కీలకమైన మిఠేరి వంతెన కొట్టుకుపోవడంతో పాటు, సమీపంలోని డ్రై పోర్టులో నిలిపి ఉంచిన వందలాది వాహనాలు నీటి ప్రవాహంలో గల్లంతయ్యాయి. ఈ దుర్ఘటనలో 18 మంది వరకు గల్లంతైనట్టు సమాచారం.

రసువా జిల్లా అధికారి అర్జున్ పౌడెల్ వెల్లడించిన వివరాల ప్రకారం, చైనా వైపు కురిసిన కుండపోత వర్షాల కారణంగానే ఈ ఆకస్మిక వరద సంభవించింది. "వరద వచ్చిన సమయంలో నది పక్కన ఉన్న కస్టమ్స్ పోర్టులో సుమారు 200 వాహనాలు ఉన్నాయి. వాటిలో చాలా వరకు కొట్టుకుపోయాయి" అని ఆయన వివరించారు. ఈ ఘటనలో 12 మంది నేపాల్ పౌరులు, ఆరుగురు చైనా జాతీయులతో పాటు మొత్తం 18 మంది గల్లంతైనట్లు జాతీయ విపత్తు నిర్వహణ సంస్థ వెల్లడించింది. వాహనాల్లో నిద్రిస్తున్న కొందరు కూడా ప్రవాహంలో కొట్టుకుపోయి ఉండవచ్చని అధికారులు ఆందోళన వ్యక్తం చేస్తున్నారు. "నీటిమట్టం ఇంకా ప్రమాదకర స్థాయిలోనే ఉంది. వాతావరణం కూడా అనుకూలంగా లేదు" అని పౌడెల్ పేర్కొన్నారు. వంతెన కూలిపోవడంతో ఇరు దేశాల మధ్య రాకపోకలు నిలిచిపోయి, పలువురు వ్యాపారులు చిక్కుకుపోయారు.

ఈ తెల్లవారుజామున 3 గంటల సమయంలో ఈ దుర్ఘటన జరిగినట్టు అధికారులు తెలిపారు. టిబెట్ ప్రాంతంలో కురిసిన భారీ వర్షాలే ఈ వరదకు కారణమై ఉండవచ్చని ప్రాథమికంగా అంచనా వేస్తున్నారు. ఈ నేపథ్యంలో, త్రిశూలి నది పరివాహక ప్రాంతాల ప్రజలు అప్రమత్తంగా ఉండాలని స్థానిక యంత్రాంగం హెచ్చరికలు జారీ చేసింది.