ఎన్టీఆర్ 30వ సినిమా కోసం భారీ సెట్స్ .. రెగ్యులర్ షూటింగ్ ఎప్పటి నుంచి అంటే..!

కొరటాల దర్శకత్వంలో ఎన్టీఆర్ సినిమా ఎప్పుడు సెట్స్ పైకి వెళుతుందా అని అభిమానులంతా ఎంతో ఆసక్తికరంగా ఎదురుచూస్తున్నారు. గతంలో ఎన్టీఆర్ - కొరటాల కాంబినేషన్లో వచ్చిన 'జనతా గ్యారేజ్' భారీ విజయాన్ని అందుకుంది. దాంతో సహజంగానే ఈ ఇద్దరి కాంబోగా రానున్న సినిమా అందరిలో ఆత్రుతను పెంచుతోంది. 

ఇప్పటికే ఈ సినిమా సెట్స్ పైకి వెళ్లవలసి ఉంది. కానీ ఎన్టీఆర్ వ్యక్తిగత కారణాల వలన ఆలస్యమవుతూ వచ్చింది. ఇక ఇప్పుడు ఎన్టీఆర్ కాస్త ఫ్రీ అయ్యాడు. అందువలన ఈ నెల 23వ తేదీన ఈ సినిమా పూజా కార్యక్రమాలను నిర్వహించనున్నట్టు సమాచారం. రెగ్యులర్ షూటింగును ఈ నెల 30 నుంచి మొదలుపెడతారట. 

ఈ సినిమా కోసం హైదరాబాద్ శివారు ప్రాంతంలో భారీ సెట్స్ ను వేయించారని అంటున్నారు. రామ్ -  లక్ష్మణ్ కంపోజ్ చేసిన ఫైట్స్ చిత్రీకరణతో ఫస్టు షెడ్యూల్ మొదలు కానుందని అంటున్నారు. ఎన్టీఆర్ తో తలపడే విలన్ పాత్రలో 'సైఫ్ అలీ ఖాన్' కనిపించనున్నాడని చెబుతున్నారు. వచ్చే ఏడాది ఏప్రిల్ 5న ఈ సినిమాను 9 భాషల్లో రిలీజ్ చేయనున్నారని సమాచారం.