ధైర్యంగా ముందుకు వచ్చి.. షూటింగులో పాల్గొన్న నాగార్జున!

కరోనా దెబ్బకు సుమారు ఐదు నెలల నుంచి షూటింగులన్నీ దాదాపు ఆగిపోయాయి. దర్శక నిర్మాతలు ధైర్యం చేసి షూటింగులు ప్రారంభిద్దామన్నా హీరోలు, హీరోయిన్లు ఎవరూ ముందుకు రావడం లేదు. కరోనాకి భయపడి వాయిదాల మీద వాయిదాలు వేస్తున్నారు. జాగ్రత్తలు తీసుకుని నిబంధనలు పాటిస్తూ షూటింగులు చేసుకోవచ్చని ప్రభుత్వం చెబుతున్నా ఒకరిద్దరు తప్పించి ఎవరూ షూటింగుకి రావడం లేదు.

ఈ తరుణంలో అక్కినేని నాగార్జున ధైర్యం చేశారు. ఏమాత్రం నదురూబెదురూ లేకుండా షూటింగుకి రెడీ అన్నారు. ఇప్పటికే 'బిగ్ బాస్ 4' రియాలిటీ షో షూటింగులో పాల్గొన్న ఆయన ఈ రోజు హైదరాబాదులో 'వైల్డ్ డాగ్' చిత్రం షూటింగులో కూడా జాయిన్ అయ్యారు. అహిశోర్ సోల్మన్ దర్శకత్వంలో రూపొందుతున్న ఈ క్రైమ్ థ్రిల్లర్ షూటింగ్ కోసం చిత్రం యూనిట్ ఎన్నో జాగ్రత్తలు తీసుకుంది. నాగార్జున చాలా హుషారుగా ఈ చిత్రం షూటింగులో పాల్గొన్నారని యూనిట్ చెబుతోంది. ఇందుకు సంబంధించిన వీడియోను చిత్ర నిర్మాణ సంస్థ మేటినీ ఎంటర్ టైన్మెంట్ విడుదల చేసింది.