ప్రపంచ సాహసికుడు బేర్ గ్రిల్స్ కు థ్యాంక్స్ చెప్పిన రజనీకాంత్

ప్రపంచ సాహసికుడు బేర్ గ్రిల్స్ కు దక్షిణాది సూపర్ స్టార్ రజనీకాంత్ కృతజ్ఞతలు తెలిపారు. బేర్ గ్రిల్స్ నిర్వహణలో 'మ్యాన్ వర్సెస్ వైల్డ్' అనే కార్యక్రమం డిస్కవరీ చానల్ లో ప్రసారమవుతుందన్న సంగతి తెలిసిందే. ఈ కార్యక్రమంలో ఇప్పటికే ప్రధాని మోదీ కూడా పాల్గొన్నారు. తాజాగా, తలైవా రజనీకాంత్ ను కూడా బేర్ గ్రిల్స్ తన వెంట కొండకోనల్లో తిప్పాడు. ప్రకృతిలో ఎలా మనుగడ సాగించాలో చేసి చూపించాడు. ఈ క్రమంలో రజనీ స్వల్పగాయాలపాలయ్యారు.

అయితే, ఇదో మరుపురాని అనుభవం అని రజనీకాంత్ ట్విట్టర్ లో స్పందించారు. బేర్ గ్రిల్స్ తో 'మ్యాన్ వర్సెస్ వైల్డ్' కార్యక్రమంలో భాగంగా అడవుల్లో సంచరించడం అద్భుతమని పేర్కొన్నారు. ఈ సందర్భంగా రజనీ డిస్కవరీ చానల్ కు కూడా ధన్యవాదాలు తెలిపారు. కాగా, ఈ కార్యక్రమంలో బేర్ గ్రిల్స్, రజనీకాంత్ కర్ణాటకలోని బండిపుర అడవుల్లో సాహసాలు చేసినట్టు తెలుస్తోంది. ఈ కార్యక్రమం త్వరలోనే డిస్కవరీ చానల్లో ప్రసారం కానుంది.