అమెరికాలో మళ్లీ గర్జించిన తుపాకీ.. 9 మంది దుర్మరణం, 16 మందికి తీవ్రగాయాలు!

అమెరికాలోని ఎల్ పాసోలో ఓ ఉన్మాది 20 మందిని కాల్చిచంపిన ఘటన మర్చిపోకముందే మరో దారుణం చోటుచేసుకుంది. ఒహాయో రాష్ట్రంలోని డేటన్ పట్టణంలో ఓ అగంతకుడు జరిపిన కాల్పుల్లో 9 మంది దుర్మరణం చెందారు. ఈ సందర్భంగా పోలీసులు జరిపిన ఎదురుకాల్పుల్లో నిందితుడు ప్రాణాలు కోల్పోయాడు. డేటన్ పట్టణంలోని నెడ్ పెప్పర్స్ బార్ వద్దకు  ఓ ఆగంతకుడు నిన్న అర్థరాత్రి దాటాక 1.20 గంటల సమయంలో వచ్చాడు. అయితే ఈ సందర్భంగా బార్ లోకి వెళ్లకుండా కొందరు అతడిని అడ్డుకున్నారు.

దీంతో సహనం కోల్పోయిన సదరు వ్యక్తి తుపాకీ తీసి ఇష్టానుసారం కాల్పులు జరిపాడు. దీంతో బార్ లోని కస్టమర్లు ఇచ్చిన సమాచారంతో ఘటనాస్థలికి చేరుకున్న పోలీసులు దుండగుడిని కాల్చిచంపారు. కాగా, ఈ ఘటనలో 9 మంది చనిపోగా, 16 మందికి తీవ్రగాయాలు అయ్యాయి. వీరిని పోలీసులు అంబులెన్సుల్లో ఆసుపత్రులకు తరలించి చికిత్స అందజేస్తున్నారు. కాగా, నిందితుడి వివరాలు ఇంకా తెలియాల్సి ఉందనీ, పూర్తి వివరాలను త్వరలో ప్రకటిస్తామని డేటన్ పోలీసులు చెప్పారు.