ఏపీలోని నాలుగు జిల్లాల్లో ఎన్నికల కోడ్ ను ఎత్తివేసిన ఈసీ!

ఉత్తరాంధ్రపై పెను తుపాను ‘ఫణి’ తీవ్ర ప్రభావం చూపుతున్న నేపథ్యంలో కేంద్ర ఎన్నికల సంఘం కీలక నిర్ణయం తీసుకుంది. శ్రీకాకుళం, విశాఖపట్నం, తూర్పు గోదావరి, విజయనగరం జిల్లాలకు ఎన్నికల కోడ్ నుంచి మినహాయింపు ఇచ్చింది. ఈ నాలుగు జిల్లాల్లో సహాయక చర్యలు చేపట్టేందుకు వీలుగా, వాటిని అధికార యంత్రాంగం పర్యవేక్షించేందుకు ఈసీ ఈ నిర్ణయం తీసుకుంది.

తాజా నిర్ణయం నేపథ్యంలో అధికారులు ఇక్కడ సహాయక చర్యలను ముమ్మరం చేయనున్నారు. అలాగే ప్రభుత్వం ఇక్కడి పరిస్థితిని సమీక్షించడం వీలవుతుంది. ఒడిశాలోని పూరీ వద్ద ఫణి తుపాను తీరాన్ని తాకిన సంగతి తెలిసిందే. దీని ప్రభావంతో మరో 3-4 గంటలు భారీ వర్షాలు, భీకరమైన గాలులు వీస్తాయని వాతావరణ శాఖ హెచ్చరించింది.