జపాన్ వెళుతోన్న ప్రభాస్ - అనుష్క .. మళ్లీ పుకార్లు మొదలు

ప్రభాస్ .. అనుష్క వరుస సినిమాలు చేస్తూ రావడం వలన, వాళ్లిద్దరి మధ్య ప్రేమ వ్యవహారం కొనసాగుతోందనే ప్రచారం జరుగుతోంది. తమ మధ్య స్నేహం మాత్రమే ఉందంటూ అటు అనుష్క .. ఇటు ప్రభాస్ చెప్పినప్పటికీ, ఈ పుకార్లు ఆగలేదు. ఇక త్వరలో ప్రభాస్ .. అనుష్క జపాన్ వెళ్లనున్నారనే వార్త బయటికి రావడంతో, మళ్లీ ఈ పుకార్లు ఊపందుకున్నాయి.

అయితే వీరు జపాన్ వెళ్లేది అక్కడ రిలీజ్ కానున్న 'మిర్చి' సినిమా ప్రమోషన్స్ లో పాల్గొనడానికని తెలుస్తోంది. 'బాహుబలి' తరువాత జపాన్ లోను ప్రభాస్ .. అనుష్కలకు విపరీతమైన క్రేజ్ పెరిగిపోయింది. దాంతో అంతకుముందు ఈ ఇద్దరి కాంబినేషన్లో వచ్చిన 'మిర్చి'ని అక్కడ విడుదల చేయడానికి సన్నాహాలు చేస్తున్నారు. ప్రమోషన్స్ లో పాల్గొనమంటూ అక్కడి డిస్ట్రిబ్యూటర్ పంపిన ఆహ్వానం మేరకు ఈ ఇద్దరూ వెళ్లనున్నట్టు సమాచారం. ఇక ప్రభాస్ నటించిన 'డార్లింగ్' సినిమాను కూడా అక్కడ విడుదల చేసే దిశగా ప్రయత్నాలు జరుగుతున్నాయట.