మనం గెలవాల్సిందే... లేకుంటే కష్టం: చంద్రబాబునాయుడు

ఇది ఎన్నికల సంవత్సరమని, ప్రతి తెలుగుదేశం నేత, కార్యకర్త, వచ్చే నాలుగైదు నెలలూ విజయం కోసం బాగా శ్రమించాలని ఏపీ సీఎం చంద్రబాబునాయుడు పిలుపునిచ్చారు. ఈ ఉదయం టీడీపీ నేతలతో టెలీ కాన్ఫరెన్స్ నిర్వహించిన ఆయన, పలు కీలక వ్యాఖ్యలు చేశారు. నేడు ప్రారంభమైన 'జన్మభూమి - మా ఊరు' కార్యక్రమాన్ని దిగ్విజయం చేయాలని సూచించారు. ఈ పది రోజులూ నాయకులు గ్రామాలు, వార్డుల్లోనే ఉండాలని ఆదేశించారు. ప్రతి ఒక్కరికీ ఏమేమి సమస్యలు ఉన్నాయో తెలుసుకోవాలని అన్నారు.

ఈ సంవత్సరం తెలుగుదేశం పార్టీకి, ఆంధ్రప్రదేశ్ కు అత్యంత కీలకమని, భావితరాల భవిష్యత్తు ఈ ఎన్నికలపైనే ఆధారపడివుందని పేర్కొన్న చంద్రబాబు, రానున్న ఎన్నికల్లో తెలుగుదేశం గెలిస్తేనే, రాష్ట్రాన్ని కాపాడుకోవచ్చని, ఈ విషయాన్ని ప్రజలకు సవివరంగా తెలియజేయాలని నేతలకు సూచించారు. టీడీపీ గెలవకుంటే రాష్ట్రం చాలా కష్టాల్లోకి నెట్టివేయబడుతుందని ఆయన అభిప్రాయపడ్డారు.  25 ఎంపీ సీట్లు, 150 అసెంబ్లీ సీట్లలో గెలుపే లక్ష్యంగా కృషి చేయాలని చంద్రబాబు దిశానిర్దేశం చేశారు.