వచ్చే ఎన్నికల్లో పెద్దాపురం నుంచే పోటీ చేస్తాను: నిమ్మకాయల చినరాజప్ప

వచ్చే ఎన్నికల్లో తాను పెద్దాపురం నుంచే పోటీ చేస్తానని ఏపీ డిప్యూటీ సీఎం నిమ్మకాయల చినరాజప్ప అన్నారు. కోనసీమకు చెందిన తనను ఈ నియోజకవర్గ ప్రజలు ఎంతో ఆదరించారని, తాను పలు అభివృద్ధి పనులు చేశానని తెలిపారు. వచ్చే ఎన్నికల్లో తాను ఇక్కడి నుంచి కాకుండా మరో నియోజకవర్గం నుంచి పోటీ చేస్తానని కొందరు దుష్ప్రచారం చేస్తున్నారని చెప్పారు.

తూర్పు గోదావరి జిల్లా పెద్దాపురంలో నిర్వహించిన ఓ కార్యక్రమంలో చినరాజప్ప పాల్గొన్నారు. ఈ సందర్భంగా ఆయన మాట్లాడుతూ... తాను ఈ నియోజకవర్గంలో చేయాల్సి పనులు ఇంకా కొన్ని ఉన్నాయని, డీఎస్పీ, అగ్నిమాపకశాఖల ఆఫీసుల భవనాల నిర్మాణాలు పూర్తవుతున్నాయని చెప్పారు. ఆంధ్రప్రదేశ్‌ ముఖ్యమంత్రి చంద్రబాబు నాయుడు రాష్ట్రంలో పేదల కోసం అనేక సంక్షేమ పథకాలను అమలు చేస్తున్నారని చినరాజప్ప అన్నారు.