కర్ణాటక బీజేపీ నేత కాన్వాయ్ పై రాళ్ల దాడి

కర్ణాటక బీజేపీ నేత కారుపై రాళ్ల దాడి జరిగింది. చిత్ర దుర్గ జిల్లాలోని మొల్కలమూర్ నియోజకవర్గ అభ్యర్థిగా శ్రీరాములుకు బీజేపీ టికెట్ కేటాయించింది. శ్రీరాములుకు టికెట్ కేటాయించడంపై మొల్కలమూర్ సిట్టింగ్ ఎమ్మెల్యే తిప్పేస్వామి వర్గీయులు ఆగ్రహం వ్యక్తం చేస్తున్నారు. ఈ నేపథ్యంలో శ్రీరాములు కాన్వాయ్ పై తిప్పేస్వామి వర్గీయుులు దాడికి పాల్పడినట్టు తెలుస్తోంది. ఈ సంఘటనతో పోలీసులు అప్రమత్తమయ్యారు. తిప్పేస్వామి వర్గీయులను చెదరగొట్టారు.

కాగా, కర్ణాటకలో బీజేపీ అధికారంలోకి వస్తే ఉపముఖ్యమంత్రి పదవిని శ్రీరాములుకు ఇవ్వాలని ఆ పార్టీ భావిస్తున్నట్టు సమాచారం. కర్ణాటకలో ప్రస్తుతం అధికారంలో ఉన్న కాంగ్రెస్ పార్టీ అక్కడి దళితులకు కీలకపదవులు ఇవ్వకపోవడం, వర్గీకరణకు కాంగ్రెస్ పార్టీ అంగీకరించకపోవడంపై మాదిగలు అసంతృప్తితో ఉన్నట్టు సమాచారం. దళితులను, ‘గాలి’ వర్గాన్ని సంతృప్తి పరిచేందుకు బీజేపీ వ్యూహాత్మకంగా ఈ నిర్ణయం తీసుకున్నట్టు సమాచారం.