రాజశేఖర్ కూతురు శివాని మూవీ లాంచ్ రేపే!

జీవిత .. రాజశేఖర్ దంపతుల కుమార్తె 'శివాని' హీరోయిన్ గా ఎంట్రీ ఇవ్వనున్నట్టు కొంతకాలంగా వార్తలు వస్తున్నాయి. సరైన కథ దొరికితే శివానిని వెండితెరకి పరిచయం చేస్తామని జీవిత .. రాజశేఖర్ లు చెబుతూ వచ్చారు. ఈ నేపథ్యంలోనే హిందీలో హిట్ కొట్టిన '2 స్టేట్స్' సినిమాను తెలుగులో రీమేక్ చేస్తున్నారు. ఈ సినిమా కోసం శివానిని ఎంపిక చేసుకున్నారు.

అడివి శేష్ ప్రధానమైన పాత్రను పోషించే ఈ సినిమా ద్వారా వెంకట్ కుంచ దర్శకుడిగా పరిచయమవుతున్నాడు. హైదరాబాద్ .. అన్నపూర్ణ స్టూడియోలో రేపు ఉదయం 8 గంటలకు ఈ సినిమా పూజా కార్యక్రమాలు నిర్వహించి, 8.36 నిమిషాలకి షూటింగును మొదలుపెట్టనున్నారు. అనూప్ రూబెన్స్ ఈ సినిమాకి సంగీతాన్ని అందిస్తున్నాడు. ఈ సినిమాలో శివాని తల్లి పాత్రలో బాలీవుడ్ సీనియర్ హీరోయిన్ భాగ్యశ్రీ నటించనుండటం విశేషం.