పెళ్లి తరువాత చాదస్తం పెరిగిపోయింది: సమంత

ఇటీవలే అక్కినేని వారింటి కోడలుగా కొత్త బాధ్యతలు తీసుకున్న సమంతకు చాదస్తం పెరిగిపోయిందట. ఈ విషయాన్ని ఆమే స్వయంగా అంగీకరించింది. పెళ్లి తరువాత అబ్బాయిలు, అమ్మాయిల్లో చాలా మార్పులు వస్తుంటాయిగానీ, తనలో మాత్రం వ్యక్తిగతంగా పెద్ద మార్పు లేదని, అయితే, మొదటి నుంచి తనకు చాదస్తం ఎక్కువని, పెళ్లి తరువాత అది మరింతగా పెరిగిందని చెప్పింది.

తన స్వేచ్ఛను కోల్పోవాల్సిన అవసరం రాలేదన్న సమంత, ఏదైనా కథ వింటే తప్పులు వెదికే వైఖరి మరింతగా పెరిగిపోయిందని చెప్పింది. పెళ్లి ముందు కాస్త నచ్చని కథలు తన ముందుకు వచ్చినప్పుడు, 'అది నచ్చలేదు, ఇది నచ్చలేదు' అంటూ చెబుతుండేదాన్నని, ఇప్పుడు ఆ చాదస్తం ఎక్కువైందని వాపోయింది. మంచి సినిమాలు చేతిలో ఉండటం వల్లే నచ్చని కథలను అలా వదిలేస్తున్నానని అంటోంది సమంత.