‘సాహో’లో నటించే అవకాశం పోగొట్టుకున్న అనుష్క.. అధిక బరువే కారణం?

‘బాహుబలి’ జంట ప్రభాస్, అనుష్క మరోమారు జోడీ కట్టనున్నారని, ‘సాహో’లో కలిసి నటిస్తున్నారనే వార్తలు ఫిల్మ్ నగర్ లో హల్ చల్ చేసిన విషయం తెలిసిందే. అయితే, ఓవర్ వెయిట్ కారణంగా అనుష్కకు ఆ సినిమాలో నటించే అవకాశం దక్కలేదని తెలుస్తోంది. ‘బాలీవుడ్ లైఫ్’ కథనం ప్రకారం, అనుష్క తన బరువును తగ్గించుకునే ప్రయత్నం చేస్తున్నప్పటికీ, ఇంకా ఐదు నుంచి ఎనిమిది కిలోల బరువు తగ్గాల్సి ఉందట. దీంతో, ‘సాహో’లో నటించే అవకాశం అనుష్క కోల్పోయిందని సమాచారం.

కాగా, ‘సాహో’ను తెలుగు, తమిళ, మలయాళ, హిందీ భాషల్లో దర్శకుడు సుజిత్ రూపొందిస్తున్నారు. 2018లో ఈ చిత్రం ప్రేక్షకుల ముందుకు రానుంది. ప్రభాస్ సరసన మొదట కత్రినాకైఫ్ నటిస్తుందని అనుకున్నారు. అయితే, కత్రినా అంగీకరించలేదు. దీంతో, మరోనటి శ్రద్ధాకపూర్ కు అవకాశం దక్కింది. కానీ, ఆమె అధిక రెమ్యూనరేషన్ డిమాండ్ చేయడంతో నిర్మాత అందుకు అంగీకరించలేదు. దీంతో, ఆ అవకాశం అనుష్కను వరించింది. కానీ, ఓవర్ వెయిట్ కారణంగా ఆ అవకాశాన్ని స్వీటీ పోగొట్టుకోవాల్సి వచ్చింది. కాగా, గతంలో విడుదలైన ‘సైజ్ జీరో’ చిత్రం కోసం అనుష్క బరువు పెరిగింది. అయితే, ఆ చిత్రం తర్వాత సాధారణ బరువుకు వచ్చేందుకు ఆమె ఎంతగా ప్రయత్నిస్తున్నప్పటికీ ఫలితం కనపడడం లేదట!