'నీట్'లో ఇకపై మూడు ఛాన్సులే!

వైద్య విద్య కోర్సుల్లో ప్రవేశార్హత కోసం జాతీయ స్థాయిలో సీబీఎస్ఈ 'నీట్' పరీక్షను నిర్వహిస్తున్న సంగతి తెలిసిందే. గతంలో ఏపీలో ఈ పరీక్ష లేనప్పటికీ ఈ ఏడాది నుంచి ఏపీలో కూడా వైద్య విద్యకు ఈ పరీక్షనే రాయాల్సి ఉంటుంది. ఈ నేపథ్యంలో ఈ పరీక్షపై కేంద్ర ఆరోగ్య, కుటుంబ సంక్షేమ మంత్రిత్వ శాఖ మెడికల్ కౌన్సిల్‌ తో కలిసి పలు కొత్త నిర్ణయాలు తీసుకుంది. ఈ ఏడాది మే 7న నీట్ జరగనుంది. ఈ పరీక్ష రాసేందుకు గరిష్ఠ వయోపరిమితి 25 ఏళ్లని స్పష్టం చేశారు. రిజర్వుడు కేటగిరీల వారికి ఐదేళ్ల సడలింపు ఉంటుంది. అయితే ఎవరైనా సరే ఈ పరీక్షను గరిష్ఠంగా మూడుసార్లు మాత్రమే రాసే అవకాశం ఉందని స్పష్టం చేశారు.

దీనిని సీబీఎస్ఈ తన వెబ్‌ సైట్‌ లో కూడా బులెటిన్ రూపంలో పొందుపరిచింది. ఇప్పటికే మూడుసార్లు ఏఐపీఎంటీ/నీట్ పరీక్ష రాసినవాళ్లు ఈసారి పరీక్షకు హాజరయ్యే అర్హత లేదని స్పష్టం చేసింది. ఇకపై మాత్రం కొత్తగా ఈ ఏడాది అటెంప్ట్ ను తొలిసారిగా నమోదు చేస్తారని, ఈ సారికి గతంలో ఏఐపీఎంటీ/నీట్ రాసినవాళ్లను కూడా అనుమతించనున్నారని తెలిపారు. అయితే వారు గరిష్ఠ వయోపరిమితి నిబంధనను మాత్రం దాటకూడదని తెలిపారు. అలాగే పై కారణంతో ఇప్పటికే ఏవైనా దరఖాస్తులను తిరస్కరించి ఉంటే, వాళ్లు మళ్లీ దరఖాస్తు చేసుకునే వెసులుబాటు కల్పిస్తున్నామని తెలిపారు.