ఐపీఎస్ అవతారం ఎత్తిన పంజాబ్ మాజీ మంత్రి మనవడు... 60 మందిని బురిడీ కొట్టించిన వైనం!

పంజాబ్ లో నకిలీ ఐపీఎస్ అధికారిని పోలీసులు పట్టుకున్నారు. విజిలెన్స్ అధికారులు తమ నుంచి డబ్బులు డిమాండ్ చేస్తున్నారని, ఇవ్వకుంటే అవినీతి కేసు పెడతామని బెదిరిస్తున్నారంటూ అమృత్ సర్ డివిజన్ అటవీశాఖాధికారి ఎస్.కే.సాగర్ పోలీసులకు గత నెల ఫిర్యాదు చేశారు. దీంతో విజిలెన్స్, పోలీసు అధికారులు నిఘా వేసి నకిలీ ఐపీఎస్ అధికారి రాహుల్ కుమార్ ను అరెస్టు చేశారు. ఈ మేరకు అమృత్ సర్ సీనియర్ ఎస్పీ పాటిల్ కే బలరామ్ మాట్లాడుతూ, రాహుల్ కుమార్ విజిలెన్స్ ఎస్పీగా పరిచయం చేసుకుని సుమారు 60 మందికిపైగా ప్రభుత్వ అధికారులను బురిడీ కొట్టించాడన్నారు. వారి నుంచి సుమారు 30 లక్షల రూపాయలకు పైగా మొత్తాన్ని వసూలు చేశాడని ఆయన వెల్లడించారు. కాగా, రాహుల్ కుమార్ పంజాబ్ మాజీ మంత్రి జ్ఞాన్ చంద్ మనవడు, దీనానగర్ మాజీ ఎమ్మెల్యే రూప్ రాణి కుమారుడని ఆయన తెలిపారు. రాహుల్ చేతిలో మోసపోయిన వారిలో సూపరింటెండెంట్ ఇంజనీర్ ర్యాంక్ అధికారులు, జిల్లా ఆహార సరఫరా కంట్రోలర్, చీఫ్ మెడికల్ ఆఫీసర్, ఎగ్జిక్యూటివ్ ఇంజనీర్, జిల్లా వైద్యశాఖ అధికారి, సహకార సంఘాల అధికారులు, రోడ్డు రవాణ అధికారులు ఉన్నారని ఆయన చెప్పారు. రాహుల్ ను విచారిస్తున్నామని, ఆయన అధికారుల నుంచి ఎంత మొత్తం వసూలు చేశాడన్నది తెలియాల్సి ఉందని ఆయన తెలిపారు.