టీచర్ గా మారిన సీఎం చంద్రబాబు!... పిల్లలకు నీతి కథ చెప్పిన ‘చంద్రం మాస్టారు’!

ఏపీ సీఎం నారా చంద్రబాబునాయుడు కొద్దిసేపటి క్రితం సరికొత్త అవతారం ఎత్తారు. ఏపీ ప్రభుత్వం చేపట్టిన ‘విద్యాంజలి’ కార్యక్రమంలో భాగంగా నేటి ఉదయం కృష్ణా జిల్లా గన్నవరం మండలం ఆత్కూరు గ్రామంలోని జిల్లా పరిషత్ ఉన్నత పాఠశాలకు వెళ్లిన చంద్రబాబు... అక్కడి ఓ తరగతి గదిలోకి వెళ్లి ఉపాధ్యాయుుడు కూర్చుండే సీటులో కూర్చున్నారు. కళ్లద్దాలు పెట్టుకుని ‘చంద్రం మాస్టారు’లా ఆయన మారిపోయారు. అక్కడి విద్యార్థుల వద్ద ఉన్న ఓ పుస్తకాన్ని తీసుకుని అందులోని ‘దురాశ దు:ఖానికి చేటు’ అనే నీతి కథను సాంతం చదివారు. ఈ కథను సాంతం చదువుతూనే మధ్య మధ్యలో దానిని విద్యార్థులకు అర్థమయ్యేలా వివరించారు. ఇక పాఠం చెప్పడం అయిపోయిన తర్వాత ఆ నీతి కథ ద్వారా ఏమి బోధపడిందని ఆయన విద్యార్థులను ప్రశ్నించారు. తొలుత విద్యార్థులు కాస్తంత బెరుకుగా నోరు మెదపకున్నా... చంద్రబాబు చొరవతో ఆ తర్వాత వేగంగా సమాధానాలు చెప్పారు. విద్యార్థుల నుంచి పూర్తి స్థాయిలో సమాధానాలు రాబట్టిన తర్వాత గాని చంద్రబాబు అక్కడి నుంచి కదలలేదు. ఈ మొత్తం వ్యవహరాన్ని చంద్రబాబు పక్కనే కూర్చున్న ఏపీ మానవ వనరుల శాఖ మంత్రి గంటా శ్రీనివాసరావు ఆసక్తిగా పరిశీలించారు.