గోదారిపోయి కృష్ణమ్మ వచ్చేస్తోంది!

దాదాపు ఏడాది పాటు అధికారులను ఉరుకులు, పరుగులు పెట్టించిన గోదావరి మహా పుష్కరాలు నాలుగో రోజుకు చేరాయి. మరో 8 రోజుల్లో ముగిసిపోతాయి. ఆ తరువాత... వచ్చే సంవత్సరం దాదాపు ఇదే సమయానికి కృష్ణమ్మకు పుష్కర శోభ వస్తుంది. ఎక్కడో పడమటి కనుమలలో ఉన్న మహాబలేశ్వర్ కు ఉత్తరంగా మహదేవ్ పర్వత శ్రేణిలో సముద్ర మట్టానికి 1337 మీటర్ల ఎత్తున చిన్న ధారగా జన్మించి, అనేక ఉపనదులను తనలో కలుపుకుంటూ మహారాష్ట్ర, కర్ణాటక, తెలంగాణ, ఆంధ్రప్రదేశ్‌ లలో లక్షలాది ఎకరాల పంటను సస్యశ్యామలం చేస్తూ, 1,400 కిలోమీటర్లు ప్రయాణం చేసి దివిసీమలోని హంసల దీవి వద్ద బంగాళాఖాతంలో కలుస్తుంది. గురుడు కన్యారాశిలో ప్రవేశించే శుభ ముహూర్తాన కృష్ణానదికి పుష్కరాలు వస్తాయి. గోదావరి పుష్కరాలు ముగియగానే, ఆంధ్రప్రదేశ్ సర్కారు కృష్ణా పుష్కరాలపై దృష్టి పెట్టనుంది. ఈ నెలాఖరులో విజయవాడలో కృష్ణా పుష్కరాలపై ప్రత్యేక సమావేశం నిర్వహించనున్నట్టు సీఎం కార్యాలయం నుంచి నదికి ఆనుకొని వున్న జిల్లాల కలెక్టర్లకు సమాచారం వెళ్లింది. జూలై 2016లో జరిగే కృష్ణా పుష్కరాల ఏర్పాట్లకు సంబంధించిన నివేదిక సిద్ధం చేయమని రాష్ట్ర ప్రభుత్వ ప్రధాన కార్యదర్శి కృష్ణారావు నుంచి ఆదేశాలు అందినట్టు తెలుస్తోంది. కాగా, కృష్ణా పుష్కరాలు కర్నూలు జిల్లాలోని శ్రీశైలం, సంగమేశ్వరం, మహబూబ్ నగర్ జిల్లా అలంపురం, తెలంగాణ, ఏపీల సరిహద్దుల్లోని నాగార్జున సాగర్, నల్గొండ జిల్లాలోని మట్టపల్లి, గుంటూరు జిల్లాలోని సత్రశాల, అమరావతి, నవ్యాంధ్ర రాజధాని ప్రాంతం, కృష్ణా జిల్లాలోని విజయవాడ తదితర ప్రాంతాల్లో వైభవంగా జరగనున్నాయి.