ఆ సినిమా పూర్తి చేసేందుకు కొత్త 'బ్రూస్ లీ' బయల్దేరాడు!

మార్షల్ ఆర్ట్స్ రంగంలో కొత్త ఒరవడి సృష్టించిన బ్రూస్ లీ ప్రేరణగా అప్పట్లో ఎందరో 'డిష్యుం, డిష్యుం' సినిమాలతో అలరించేందుకు బయల్దేరారు. బ్రూస్ లీ సినిమాలతో ఉత్తేజం పొందిన జాకీచాన్, జెట్ లీ, వాన్ డామ్ తదితరులు ఈ కోవలోకే వస్తారు. అయితే, చిన్న వయసులోనే బ్రూస్ లీ మరణించడంతో ఎంటర్ ది డ్రాగన్, ద బిగ్ బాస్, ఫిస్ట్ ఆఫ్ ఫ్యూరీ వంటి హిట్ చిత్రాలే అభిమానులకు అతని స్మృతిగా మిగిలాయి. ఇదిలా ఉంటే, ఇటీవల ఆప్ఘనిస్థాన్ కు చెందిన అబ్బాస్ అలీ జాదా అనే వ్యక్తి అచ్చు గుద్దినట్టు బ్రూస్ లీలా ఉండడంతో వార్తల్లోకెక్కాడు. ఇతగాడు కూడా మార్షల్ ఆర్ట్స్ నిపుణుడే. మనవాడికి కూడా బ్రూస్ లీనే ఆదర్శం! ఇప్పుడు అలీ జాదా ఆఫ్ఘన్ లో ఓ సెలబ్రిటీ. ఇతనికో లక్ష్యం ఉందట. బ్రూస్ లీ 1973లో చనిపోయే నాటికి అసంపూర్ణంగా మిగిలిపోయిన 'గేమ్ ఆఫ్ డెత్' సినిమాను పూర్తి చేయాలన్నదే ఆ లక్ష్యం. దీనిపై అలీ జాదా మాట్లాడుతూ... "బ్రూస్ తన చివరి చిత్రాన్ని పూర్తిచేయలేదు. సగం మాత్రమే చేశాడు. ఇప్పుడు నా ప్రాజెక్టు ఆ సినిమాను పూర్తిచేయడమే" అని వివరించాడు. అతని కోరిక నెరవేరుతుందో? లేదో? కాలమే చెప్పాలి.