వరద బాధితుల కోసం రణబీర్ కపూర్, అనుష్క శర్మల దుస్తులు వేలం

జమ్మూ కాశ్మీర్, అసోం రాష్ట్రాలను కొన్ని నెలల కిందట భీకర వరదలు ముంచెత్తిన నేపథ్యంలో ఆ రాష్ట్రాల వరద బాధితుల సహాయార్థం, అక్కడి అభివృద్ధికి తమవంతు నిధులను సేకరించేందుకు బాలీవుడ్ నటులు రణబీర్ కపూర్, అనుష్క శర్మ ముందుకొచ్చారు. ఈ నేపథ్యంలో, 'రాక్ స్టార్' చిత్రంలో రణబీర్ ధరించిన కాశ్మీరీ ఫెరాన్, 'జబ్ తక్ హే జాన్'లో అనుష్క వేసుకున్న లెదర్ జాకెట్ ను ఆన్ లైన్ సంస్థ 'ఈబే' ద్వారా వేలానికి పెట్టారు. నిన్నటి (గురువారం) నుంచి మొదలైన ఈ వేలం ఈనెల 13 వరకు జరుగుతుంది. అభిమానులు తాము ఇష్టపడే నటీనటులు ధరించిన దుస్తులను కొనుగోలు చేయవచ్చు. వేలం ద్వారా వచ్చిన నగదును రెండు రాష్ట్రాల వరద బాధితుల సహాయార్థం అందజేస్తారు. ప్రస్తుతం రణబీర్, అనుష్కలు 'బాంబే వెల్వెట్' చిత్రంలో నటిస్తున్నారు.