తప్పతాగి అమ్మాయిల హాస్టల్లో ప్రవేశించిన 'ఉన్నత విద్యావంతుడు'
అతడి పేరు అజయ్ కుమార్ (21). బాగా చదువుకున్నవాడు. భోపాల్ లోని మౌలానా ఆజాద్ నేషనల్ ఇన్ స్టిట్యూట్ ఆఫ్ టెక్నాలజీ (ఎంఏఎన్ఐటీ)లో మెటీరియల్ సైన్స్ అండ్ మెటలర్జికల్ ఇంజినీరింగ్ పట్టా పుచ్చుకుని, ప్రస్తుతం దుర్గాపూర్ లో ఎంటెక్ చేస్తున్నాడు. ఓ ఇంటర్వ్యూ నిమిత్తం భోపాల్ వచ్చిన అజయ్ కుమార్ మిత్రుడి వద్ద షెల్టర్ తీసుకున్నాడు. గురువారం నాడు తప్పతాగి నేరుగా ఎంఏఎన్ఐటీ క్యాంపస్ కు వెళ్లాడు.
అక్కడ అమ్మాయిల హాస్టల్లోని స్టడీ లాంజ్ లో ప్రవేశించి నానాయాగీ చేయసాగాడు. దీంతో, విద్యార్థినులు బెంబేలెత్తిపోయారట ఆ ఉన్నత విద్యావంతుడి విపరీత చేష్టలకు. ఓ అమ్మాయి హాస్టల్ వార్డెన్ కు సమాచారమందించడంతో, ఆమె పోలీసులకు ఫిర్యాదు చేసింది. అనంతరం, పోలీసులు అజయ్ కుమార్ ను అరెస్టు చేశారు. అతడికింకా కిక్కు దిగలేదని, అమ్మాయిల హాస్టల్ కు ఎందుకు వెళ్లాడో చెప్పలేకపోతున్నాడని పోలీసులు తెలిపారు.