పవార్ 'మధ్యంతరం' వ్యాఖ్యలపై విరుచుకుపడ్డ శివసేన
మహారాష్ట్రలో త్వరలో మధ్యంతర ఎన్నికలు జరుగుతాయని, వాటిని ఎదుర్కొనేందుకు కార్యకర్తలు సిద్ధంగా ఉండాలనీ ఎన్సీపీ అధినేత శరద్ పవార్ చేసిన వ్యాఖ్యలను శివసేన దుయ్యబట్టింది. రాజకీయాలపై అపనమ్మకం ఉన్నవారే ఈ తరహా మాటలు మాట్లాడతారని సొంత పత్రిక సామ్నాలో ఆ పార్టీ విమర్శించింది. రాష్ట్రంలోని రాజకీయ అస్థిరతను ఆయన తనకు అనుకూలంగా మార్చుకోవాలని చూస్తున్నారంది. తొలుత బేషరతు మద్దతు ప్రకటించిన పవార్ పార్టీ, ఇప్పుడు బీజేపీని బ్లాక్ మెయిల్ చేయాలని చూస్తోందని ఆరోపించింది. తాము మాత్రం అవకాశవాద రాజకీయాలకు దూరంగా ఉంటామని, నిర్మాణాత్మక ప్రతిపక్షంగా వ్యవహరిస్తామని తెలిపింది.