ఇరాన్కు డొనాల్డ్ ట్రంప్ తలవంచారా?.. అమెరికా-ఇరాన్ డీల్పై 'సరెండర్' అంటూ తీవ్ర విమర్శలు!
- అమెరికా, ఇరాన్ మధ్య 60 రోజుల కాల్పుల విరమణ ఒప్పందం
- ఇరాన్కు ట్రంప్ తలవంచారంటూ అమెరికాలో తీవ్ర విమర్శలు
- ఒప్పందాన్ని వ్యతిరేకించిన ఇజ్రాయెల్.. దాడులు కొనసాగిస్తామని ప్రకటన
- ఇజ్రాయెల్ దాడులపై స్పందించిన ట్రంప్.. నెతన్యాహుపై ఆగ్రహం
- అంతర్జాతీయంగా తగ్గిన క్రూడాయిల్ ధరలు, చర్చలపై ఉత్కంఠ
ఇరాన్ను ‘నిబంధనలు లేని శరణాగతి’ (Unconditional Surrender) కోరతామని గతంలో ప్రగల్భాలు పలికిన ట్రంప్.. ఇప్పుడు ఆ దేశ అణు సామర్థ్యాలను పూర్తిగా అణచివేయకుండానే ఇలాంటి డీల్ కుదుర్చుకోవడం ఇరాన్ ముందు మోకరిల్లడమేనని విపక్ష డెమొక్రాట్లతో పాటు కొందరు కన్జర్వేటివ్ ఎంపీలు విమర్శిస్తున్నారు.
ఇరాన్కు బిలియన్ల కొద్దీ నిధులు అందేలా ఈ ఒప్పందం ఉందని, ఇది ఒబామా కాలం నాటి వైఫల్యాలను గుర్తుచేస్తోందని రిపబ్లికన్ వర్గాల్లోని కొందరు హాక్స్ (యుద్ధవాదులు) మండిపడుతున్నారు. ఇటు ఇరాన్ శత్రుదేశమైన ఇజ్రాయెల్ సైతం ఈ ఒప్పందాన్ని తీవ్రంగా వ్యతిరేకిస్తూ.. ఈ డీల్తో తమకు ఎలాంటి సంబంధం లేదని, లెబనాన్లోని హిజ్బుల్లాపై తమ సైనిక దాడులు ఆపేది లేదని ప్రధాని బెంజమిన్ నెతన్యాహు స్పష్టం చేశారు.
ఈ ఒప్పందం కుదిరిన కొన్ని గంటల్లోనే ఇజ్రాయెల్ సైన్యం దక్షిణ లెబనాన్పై జరిపిన వైమానిక దాడుల్లో నలుగురు వ్యక్తులు మరణించడంతో ఇరాన్ హెచ్చరికల తీవ్రతను పెంచింది. మరోవైపు ఈ పరిణామాలపై ట్రంప్ స్పందిస్తూ.. ప్రధాని నెతన్యాహు బాధ్యతారహితంగా వ్యవహరిస్తున్నారని బహిరంగంగానే విమర్శలు గుప్పించారు.
ఫ్రాన్స్లో జరుగుతున్న జి7 సదస్సులో పాల్గొన్న ట్రంప్.. ఇరాన్ను ఎప్పటికీ అణ్వాయుధాలను తయారు చేయనివ్వబోమని, 60 రోజుల పాటు జరిగే సాంకేతిక చర్చల్లో అణు నియంత్రణలపై కఠిన నిబంధనలు ఉంటాయని పేర్కొన్నారు. ఈ ఒప్పందంతో అంతర్జాతీయ మార్కెట్లో క్రూడాయిల్ ధరలు అదుపులోకి వచ్చినప్పటికీ.. ఇజ్రాయెల్ కఠిన వైఖరి, ఇరాన్ అణు వ్యూహాల మధ్య రాబోయే 60 రోజుల్లో ఈ శాంతి చర్చలు ఎంతవరకు సఫలమవుతాయోనన్న ఉత్కంఠ నెలకొంది.
