శిల్పా శెట్టి రెస్టారెంట్లో ధరలు ఎలా ఉన్నాయో చూశారా!

ముంబైలో ప్రముఖ బాలీవుడ్ నటి శిల్పాశెట్టి సహయాజమానిగా ఉన్న రెస్టారెంట్‌లో ధరలు సామాన్యులకు షాక్ ఇస్తున్నాయి. లోయర్ పరేల్‌లోని 'ఇంకా బై బాస్టియన్' అనే ఈ రెస్టారెంట్‌లో ఒకే ఒక్కరు చేసిన శాఖాహార భోజనానికి ఏకంగా రూ.4,672 బిల్లు కావడం ఇప్పుడు చర్చనీయాంశంగా మారింది. సోషల్ మీడియా ఇన్ఫ్లుయెన్సర్ అనీషా దీక్షిత్ ఇటీవల ఈ రెస్టారెంట్‌కు వెళ్లి తన అనుభవాన్ని పంచుకోవడంతో ఈ విషయం వెలుగులోకి వచ్చింది.

అనీషా దీక్షిత్ తన పర్యటనలో కొన్ని వెజిటేరియన్ వంటకాలను ఆర్డర్ చేశారు. వీటిలో మాక్‌టెయిల్ ధర రూ.700, క్రిస్పీ కార్న్ రూ.950, మాకీ రోల్ రూ.600, కాలీఫ్లవర్ వంటకం రూ.800, 'సింకో లెచెస్' అనే డెజర్ట్ రూ.950 అని అనీషా వెల్లడించారు. మొత్తం బిల్లు రూ.4,672 అయింది. కొన్ని వంటకాలు అద్భుతంగా ఉన్నాయని, ముఖ్యంగా డెజర్ట్‌కు ఆమె 9.5/10 రేటింగ్ ఇచ్చారు.

పెరువియన్, ఏషియన్ వంటకాలకు ప్రసిద్ధి చెందిన ఈ 'ఇంకా బై బాస్టియన్' రెస్టారెంట్‌ను విలాసవంతమైన భోజన అనుభూతి కోసం ప్రత్యేకంగా తీర్చిదిద్దారు. సుమారు 6,000 చదరపు అడుగుల విస్తీర్ణంలో, 200 మంది కూర్చునే సామర్థ్యంతో, బీచ్ క్లబ్ థీమ్‌తో దీనిని ఆకర్షణీయంగా రూపొందించారు. ఈ రెస్టారెంట్ బాస్టియన్ హాస్పిటాలిటీ గ్రూప్‌లో భాగం కాగా, ఈ గ్రూప్‌కు చెందిన ఇతర రెస్టారెంట్లు కూడా ఖరీదైన ధరలకు ప్రసిద్ధి చెందాయి.