Bryan Bennett: టీ20 వరల్డ్ కప్: టోర్నీలో ఒక్కసారి కూడా అవుట్ కాని ఓపెనర్ ఇతడే!

ప్రస్తుతం జరుగుతున్న టీ20 వరల్డ్ కప్ 2026లో చిన్న జట్టే అయినా జింబాబ్వే అద్భుతాలు సృష్టిస్తోంది. ఈ జట్టు విజయయాత్రలో ఓ యువ ఆటగాడు నిశ్శబ్దంగా హీరోగా మారాడు. అతడే 22 ఏళ్ల ఓపెనర్ బ్రయాన్ బెన్నెట్. టోర్నమెంట్‌లో ఇప్పటివరకు గ్రూప్ దశ ముగిసినా ఒక్కసారి కూడా ఔట్ కాకుండా అజేయంగా నిలిచిన ఏకైక టాప్-ఆర్డర్ బ్యాటర్‌గా బెన్నెట్ అరుదైన రికార్డు నెలకొల్పాడు. మూడు ఇన్నింగ్స్‌లలో కలిపి మొత్తం 175 పరుగులు చేసి నాటౌట్‌గా నిలిచాడు. గ్రూప్ దశలో అత్యధిక పరుగులు చేసిన ఆటగాళ్ల జాబితాలో ఆరో స్థానంలో ఉన్నప్పటికీ, 100కు పైగా పరుగులు చేసిన వారిలో ఔట్ కాని ఏకైక ఆటగాడు అతడే కావడం విశేషం.

జింబాబ్వే గ్రూప్ దశలో అజేయంగా నిలిచి సూపర్ 8కి అర్హత సాధించిందంటే దానికి ప్రధాన కారణం బెన్నెట్ నిలకడైన ప్రదర్శనే. ఆస్ట్రేలియా, శ్రీలంక వంటి బలమైన జట్లపై జింబాబ్వే చారిత్రక విజయాలు సాధించడంలో ఇతనిదే కీలక పాత్ర. ఐర్లాండ్‌తో జరిగిన తొలి మ్యాచ్‌లో 48 పరుగులతో నాటౌట్‌గా నిలిచి సునాయాస విజయాన్ని అందించాడు. ఆ తర్వాత, పటిష్టమైన ఆస్ట్రేలియాపై 56 బంతుల్లో 64 పరుగులు చేసి అజేయంగా నిలిచి జట్టుకు చారిత్రక విజయాన్ని అందించాడు. కొలంబోలో శ్రీలంకతో జరిగిన మ్యాచ్‌లో 179 పరుగుల భారీ లక్ష్య ఛేదనలోనూ 48 బంతుల్లో 63 పరుగులతో నాటౌట్‌గా నిలిచి, జట్టును గెలుపు తీరాలకు చేర్చాడు.

బెన్నెట్ ఆటతీరులో ఓ ఆసక్తికరమైన విషయం ఉంది. ఇప్పటివరకు 175 పరుగులు చేసినా, ఒక్క సిక్సర్ కూడా కొట్టకపోవడం గమనార్హం. ఒకవైపు క్రీజులో పాతుకుపోయి వికెట్ పడకుండా జాగ్రత్త పడుతూ, మరోవైపు నిలకడగా పరుగులు సాధిస్తూ సహచర ఆటగాళ్లపై ఒత్తిడి తగ్గించాడు. బెన్నెట్ అందించిన ఈ భరోసాతోనే మరో ఓపెనర్ మారుమాని (స్ట్రైక్ రేట్ 155), కెప్టెన్ సికందర్ రాజా (స్ట్రైక్ రేట్ 183) స్వేచ్ఛగా ఆడి జట్టు స్కోరును పరుగులు పెట్టించారు. 

ఇషాన్ కిషన్, పతుమ్ నిస్సాంక వంటి స్టార్ ఆటగాళ్లు హెడ్‌లైన్స్‌లో నిలుస్తుండగా, బెన్నెట్ మాత్రం ఎలాంటి ఆర్భాటం లేకుండా తన పని తాను చేసుకుపోతున్నాడు. సూపర్ 8 దశకు చేరిన జింబాబ్వేకు అతని అజేయ ఫామ్ అతిపెద్ద ఆశాకిరణంగా మారింది.