కళ్లు ఆర్పుతూ, చిరునవ్వులు రువ్విన బాల రాముడి విగ్రహం.. అంతా ఏఐ మహాత్మ్యం.. వీడియో ఇదిగో!

అయోధ్యలో బాల రాముడి విగ్రహానికి సోమవారం ప్రాణప్రతిష్ఠ జరిగిన విషయం తెలిసిందే. ప్రధాన మంత్రి నరేంద్ర మోదీతో వేద పండితులు ఈ క్రతువును నిర్వహించారు. కోట్లాది మంది ప్రత్యక్ష ప్రసారంలో ఈ వేడుకను వీక్షించారు. కర్ణాటకలోని మైసూరుకు చెందిన శిల్పి అరుణ్ యోగిరాజ్ తీర్చిదిద్దిన బాల రాముడి విగ్రహం భక్తులను ఆకట్టుకుంది. తాజాగా ఈ విగ్రహానికి సంబంధించిన ఓ వీడియో సోషల్ మీడియాలో వైరల్ గా మారింది.

ఆర్టిఫిషియల్ ఇంటెలిజెన్స్ (ఏఐ) సాయంతో గుర్తుతెలియని వ్యక్తులు బాల రాముడి విగ్రహానికి కదలికలు జోడించి సోషల్ మీడియాలో అప్ లోడ్ చేశారు. ఈ వీడియోలో బాల రాముడి విగ్రహం కళ్లు ఆర్పుతూ, అటూఇటు చూస్తూ, చిరునవ్వులు రువ్వడం కనిపిస్తోంది. ప్రస్తుతం సోషల్ మీడియాలో వైరల్ గా మారిన ఈ వీడియోపై రామ భక్తులు ప్రశంసల జల్లు కురిపిస్తున్నారు. ఈ వీడియోను అప్ లోడ్ చేసిన వ్యక్తిని మెచ్చుకుంటూ కామెంట్లు పెడుతున్నారు.